Accessibility links

җомга, 9 декабрь 2016, Казан вакыты 16:40

Törkiä Ğiraq kördläreneñ ilneñ tönyağın üz kontrolenä almawları öçen borçıla


Koalitsiä köçläre häm körd ğaskärläre tönyaq Ğiraqnıñ neft başqalası bulğan Kirkuk şähären üz kontrolenä aldı dip xäbär itelde. Mäğlümat agentlıqları, şähärdä Ğiraq ğaskärläre qarşılıq kürsätmäde, dip xäbär itte. Kirkuk xalqı şunda uq uramnarğa çığıp bäyräm itä, läkin şähärdä talawlar häm urlawlar da başlandı, dip xäbär itelä. Bügen irtän Kördlär şulay uq Kamh-mur, Altun Kutri häm Xanekin şähärlären dä alğan digän mäğlümat bar ide. Bağdadnıñ tönyaqkönbatışında mäçet öçen bulğan bäreleşlärdä ber amerikan xärbie häläk buldı häm 20se yaralandı. Başqalanıñ Säddäm köçläre kontrolendä bulğan könbatış rayonnarı utqa totıldı. Bügen Bağdadta Xalıqara qızıl xac komitetı üz eşçänlegen yañarttı. Qatardağı Üzäk xärbi idaräneñ matbuğat wäkile kapitan Frank Thorp, alğa taba amerikan ğaskärlären qatı bäreleşlär kötä äle, tönyaqta Tikrit häm Mosul şähärläre tiräsenä küp sanlı Ğiraq cömhüriät saqçıları cıyıla, dip belderde. Tikrit-Säddämneñ tuğan şähäre, Mosul isä-körd avtonomiäsenä yaqın bulğan Ğiraqnıñ 3nçe zur şähäre. Ğiraqnıñ Bağdad, Basra häm Kirkuk şähärendä urlaw-talawlar däwam itä. Bağdadta berençelärdän bulıp Säddäm rejimı wäkilläreneñ öyläre talandı, Germaniä ilçelege häm Franzus Mädäniät üzägennän äyberlär urlandı. İñ soñğı bulıp äyberlär Ğiraqnıñ transport häm Neft ministrlıqlarınnan çığarıldı, dip xäbär itelä. Amerikan generalı Vincent Brooks qatı bäreleşlär Ğiraqnıñ tönyağındağı Al-Qaim şähärendä bara, dip belderde. “Rejim köçlärenä qarşı maxsus çara al-Qaim şähärendä däwam itä. Bu yaqlar aşa Süriä häm Ğiraqnı berläştergän yul uza häm bu töbäk şulay uq ballistik raketalar atır öçen uñaylı” dide Brooks. Süriä çigendä bulğan Al-Qaim şähäre 1991nçe yılğı Farsı Qultığı suğışında iñ küp cir-cir raketaları atılğan töbäk. Törkiä tışqı eşlär ministrı Abdullah Gül, Amerika Quşma Ştatları, qorallanğan Körd köçläre Kirkuk şähären kontrol itmiäçäk, dip belderde, dide. Amerikan däwlär sekretare Colin Powell , bügen kiçkä taba şähärgä qorallanğan Törkiä küzätüçelären kertergä süz birde. Abdullah Gül, kiräk bulsa Ğiraqqa üz ğaskärlären kertergä äzer, dip beldede. Törkiä, Ğiraq kördläreneñ ilneñ tönyağındağı neftkä bay bu şähärlärne üz qulına aluı alarnıñ üz däwlätlären tözü xärkäten başlap cibärmäsen dip qurqa. Ul opraqta Törkiä kördläre dä Ğiraqtağı millättäşlärenä quşılırğa teläk belerergä mömkin.

XS
SM
MD
LG