İran tışqı eşlär ministrı Kamal Kharrazi , Amerika Quşma Ştatları Ğiraqta waqıtlı xökümät tözep strategik xata yasıyaçaq, dip belderde.Fransiädä çığa torğan köndälek Le Monde basması Kharrazi süzlären kiterep Quşma Ştatları qatnaşında qısqa waqıtqa ğına bulsa da tözelgän xökümät Ğiraq xalqın mısqıllaw bulaçaq, dip yazıp çıqtı. Yaña Ğiraq xökümäte Berläşkän Millätlär Oyışması ximayäsendä tözelergä tieş, dip östäde Kharrazi.
Amerikan xakimiäte astında Ğiraq neft çığarunı arttırırğa mömkin, şunıñ belän dönyada qara altınğa bäyälär dä töşäçäk. Bu uñaydan Kamal Kharrazi borçılu belderde.
Qıtay da bügen Berläşkän Millätlär Oyışmasın Ğiraqnı tözekländerüne üz qulına alırğa çaqırdı. Qıtyanıñ tışqı eşlär ministrlığı, Oyışmanıñ tiz arada Ğiraq mäs’äläsendä üz planın täqdim itäçägenä ömet belderde.
Britaniä tışqı eşlär ministrı Jack Straw bügen Ğiraqnıñ kiläçägen bar taraflar qatnaşında oyıştırılğan cıyın xäl itergä tieş, dip belderde. “Bilgele ber waqıtta, Ğiraq cämğiäteneñ barlıq wäkilläre qatnaşında küçeş çorı1 xakimiäteneñ nindi bulaçağın xäl iter öçen konferensiä cıyılırğa tieş” dide Jack Straw.
Şulay uq Britaniä tışqı eşlär ministrı töbäktäge üzgäreşlärgä İran belän Süriäne qatnaşırğa çaqırdı. Straw kiläse atnada Farsı qultığına bara.
Kiçä Amerikan saqlanu ministrı Donald Rumsfeldnıñ Süriäne Sädäm keşelärenä sıyınu birüendä häm qoral satuında ğayepläwe –yaña suğış iğlan itü qurqınıçı bularaq qabul itelmäskä tieş. Bu xaqta Däwlät Sekretare Colin Powell belderde. Monnan tış kiçä Rumsfeld İrannı Ğiraqtağı şiği möselmannarın yaqlawda ğayeplägän ide. Los Angeles Times gazetına bügen birgän äñgämäsendä Powell, Süriä häm İran kebek däwlätlär küpläp üterü qoralların cäyelderüneñ häm terrorçılarnı yaqlawnıñ näticäsen inde kürä ala xäzer, dide, Quşma Ştatlarnıñ mondıy däwlätlär belän eş itüdä üz yulları bar, dide Powell.
