Ğiraqta bulaçaq xakimiät turında üz plannarı belän kiçä Pentagon urtaqlaştı. Saqlanu ministrı urınbasarı Paul Wolfowitz amerikan senatınıñ xärbi köçlär komitetında çığış yasap, 3 adımnan torğan eş planın bäyän itte.
Berençedän, yaña tözeläçäk Tözekländerü häm Humanitar Yardäm Oyışması Ğiraqta yardämneñ taratıluın häm köndälek xezmätlärneñ cayğa salınuın kontrol itäçäk. Bu-Ğiraq belän idarä itüneñ berençe adımı bulıp isäplänäçäk. Köndälek kiräk-yaraqlar buldırılğaç Tözekländerü idaräse soñınnan Ğiraqnıñ küçeş çorı xakimiäte belän alıştırılaçaq . İlneñ üzendäge häm çit illärdäge Ğiraq xalqı wäkillärennän torğan waqıtlı Ğiraq xakimiäte yaña xökümät tözü eşen dä üz östenä alaçaq. Soñğı adım-Ğiraq xökümäte tözelep il belän idarä itä başlıyaçaq. Şuşı 3 öleştän toraçaq plannıñ qayçan ğamälgä keräçäge turında Wolfowitz ber süz dä äytmäde.
Amerikan xärbi wäkile Frank Thorps, kiläse atnada Ğiraq cämğiäte wäkilläre häm çittä yäşäwçe Ğiraqlılar qatnaşında ilneñ kiläçägenä bağışlanğan cıyın uzaçaq, dip xäbär itte. Cıyında Aq Yortnıñ maxsus wäkile Zalmay Khalilzad räislek itäçäk.
Bügen kiçen Peterburda Rusiä prezidentı Vladimir Putin, Fransiä citäkçese Jacque Chirac häm Germaniä kanclerı Gerhard Schroeder oçraşa. Ğiraq suğışına kisken qarşı çıqqan 3 däwlät citäkçeläre Ğiraqnı tözekländerü turında fiker alışa.
