Accessibility links

Macarstan häm Malta Yevropa Berlegenä kerü öçen tawış birä


Bügen Macarstan häm Malta’da Yevropa Berlegenä kerü turında referndum uza. Xalıq fikeren beleşülärgä qarağanda Macarstan xalqınıñ 70%tı Berläkkä kerüne xuplap tawış biräçäk. İldä fevral ayınnan birle köçle Yevropa Berlege yaqlı kampaniä bardı, parlamenttağı 4 firqa dä Berlekkä kerüne xuplıy. Macarstannıñ premyer-ministrı Peter Medgyessy, üz ileneñ monnan soñ çäçäk ataçağına ömetlänüen belderde. “Bezneñ xäzer ber ğailä buluıbız bik yaxşı, bez dä -üz qimmätläre bulğan ber ğailä äğzase. Şuşı qimmätlärne bez Yevropa Berlege äğzaläre belän urtaqlaşabız. Kiläçäktä Macarstannıñ çäçäk atuına, bay häm tınıç ber il buluına ömetlänäm,” dide Macar premyerı. Belgeçlär fikerençä Macarstannıñ Berlekkä kerüeneñ töp säbäbe-iqtisadi. Berlektäge bayraq illärgä quşılu Macarstanğa distä yıl elek betkän kommunizm çorınnan birle nığıp kitä almağan bazar iqtisadın cayğa salırğa yardäm itäçäk. Referendum bügen Qazan waqıtı belän kiçke säğat 11dä tämamlana. Maltada isä wazğiät başqa törle. Biredä uzğan ayda Berlekkä kerü turında referndum uzdı inde. Ul çaqta näticäläre qabul iterlek bulmağanı öçen bügen bu mäs’älädä xalıq parlament öçen tawış birä. Bügengä qadär fiker beleşülär, xalıqnıñ Yevropa Berlegenä kerüne yaqlağan, xakimiättäge Millätçe Partiäse öçen tawış biräçägen kürsätte. Berlekkä kerügä qarşı bulğan oppozitsiädäge Leyborist partiäse xalıq arasında bik populyar tügel. Leyboritslar bügenge tawış birüne –Yevropağa “yuq” dip äytergä soñğı mömkinlek bularaq qabul itä. Berençel näticälär irtägä töş waqıtında iğlan iteler dip kötelä.
XS
SM
MD
LG