Respublika xökümäte başlığınıñ şuşı bäyräm uñayınnan yasağan belderüendä Qazannıñ dinamika, cılılıq fizikası, astronomiä, optika, reaktiv raketalar tözelä torğan şähär buluı iskä alınğan. Kosmosqa berençe keşene oçıruda Tatarstan üz öleşen kertüe belän ğorurlana ala, dielä räsmi täbrik süzendä. Yuriy Gagarin belän bergä kosmosqa oçarğa äzerlängän Mars Rafiqovnıñ änise Tatarstannıñ Bua rayonınnan. Tatar keşeseneñ layıqlı bulıp ta, iñ berençelärdän kosmosqa çığarılmawı ğäcäp tügel. Mars Rafiqovnıñ ğibrätle yazmışı turında “Azatlıq” radiosınıñ söylägäne bar. Xäzer inde Rafikov turında räsmi televidenie kanalları täfsilläp söyli. Ğomereneñ soñğı yılların ul Kazağstannıñ Alma-Ata şähärendä ütkärgän. Yaña ğına “Qazan” jurnalınıñ çirattağı sanı çıqtı. Bu cıyıntıqta Mars Rafiqovnıñ yazmışına bağışlanğan dokumental'' povest'' häm tarixi fotoräsemnär basılğan. İmeşter, Nikita Xruşçev kosmosqa Gagarin oçtı digän süzlärne yalğış işetep, “nindi tatarin oçqan, xäzer ük qaytarığız” digän. Tatarstan keşeläreneñ kosmos yawlawğa xezmät itüläre bilgele. Möslim rayonınıñ Yaña Usa awılında tuğan Nikon Yegorov berençe kosmonavtlarnı uqıtqan. Yegorov zamanında Başqortostan Bäläbäy pedagogiä uçilişçesın da tämamlağan bulğan. Äytergä kiräk, kosmonavtika köne dip bıyıl Qazanda artıq tawış kütärmädelär.
