Accessibility links

шимбә, 10 декабрь 2016, Казан вакыты 13:53

Däwlät Şurası Rafqät Altınbaevnı wazifasınnan buşatqannan soñ qanunnar tikşerä başladı


Däwlät Şurasınıñ 15nçe sessiäsendä Federatsiä Şurasında başqarma xakimiät wäkile Rafqät Altınbaevnı wazifasınnan buşatu sensatsiäse beraz suınğaç, mäglümat çaraları sessiädä qabul itelgän başqa möhim mäsälälärgä dä iğtibar ittelär. Sişämbe räsmi xäbärlärendä sessiädä “İnformatizatsiä turında” qanun proektı berençe uqılışta qabul itelüenä añlatmalar bar. Älege qanun xalıq deputatları başlanğıçı belän täqdim itelde. Deputatlar monıñ belän xalıq ixtiacların belüläre, xalıqtan yıraqlaşmawların kürsätergä telilär. Çönki toraq-kommunal' xucalıq sistemasın reformalaw başlanu belän ğadi xalıq, bigräktä olı buın öçen problemalar başlandı. Fatir, kommunal' xezmät öçen aylıq tüläwlärgä kompyuterdan çıqqan sölge buyı xisap käğäzläre kilä başladı. Eş alarnıñ ozın, külämle buluında ğına tügel. Ozaqlap utırğaç añlarğa bula. Tik keşelärne nindider burıçlar qalğan dip aptıratıp yörtülär, añlaşu öçen dilbegä buyı çiratlarğa tezep totular başlandı. Soñınnan säbäben bik ğadi itep kompyuter özeklelege belän añlattılar. Ä inde az keremle qatlam öçen fatirğa tüläwdä subsidiälär kertkäç, bötenläy başlar butaldı. Kemgä, küpme subsidiä kiräk ikänen şaytan da, çinovnik ta belmi, bulıp çıqtı. Çönki ğailälär, alarnıñ keremnäre häm çığımnarı turında mäğlümatlar bankı yuk ikän. Döres, tözeleş, sotsial', salım ministrlıqlarınıñ mäğlümatları bar, läkin alar üzlärenä yabılğan häm kiñ qullanışqa yaraqsız bulıp çıqtılar. Bu xälne caylaw öçen berniçä ay elek “2003-2007 yıllarğa informatizatsiä häm elemtä ölkäsendä däwlät säyäsäte” konsepsiäse raslanğan ide. Läkin deputatlar bu ölkädä barlıq grajdannar, oyışmalar häm ministrlıqlar häm Ministrlar Kabinetı öçen dä ber bulğan qanun kiräk dip sanıylar. Grajdannarnıñ matdi xäle genä tügel, ministrlıyklar qabul itkän reforma proektları, qararlar, şul isäptän büdjet ta, barlıq keşe öçen açıq häm añlayışlı bulırğa tieş, didelär Däwlät Şurasında.

XS
SM
MD
LG