«Tatnet yoldızları» bäygese däwam itä

Tatarstanda «Tatnet yoldızları» digän bäyge däwam itä. Xäzerge waqıtta anda 79 avtor möräcäğät itkän. 56 saytqa bäygedä qatnaşırğa röxsät itelgän, 8 möräcäğät kire qağılğan. Bäygeneñ internet säxifäsendä yazılğança, yarışqa çığaru aldınnan jüri täqdim itelgän eşlärneñ taläplärgä turı kilü-kilmäwen tikşerä. Kire qağılğannar taläplärgä turı kilmägän, şuña kürä oyıştıruçılar bäygeneñ nigezlämäsen zurraq iğtibar belän uqırğa kiñäş itä.

Web-ostalar häm alar yasağan säxifälär “iñ-iñ” digän 12 tör isem öçen yarışa. Jüri tarafınnan qabul itelgän eşlär arasında tatar estrada cırçılarınıñ şäxsi säxifäläre, gäzitlärneñ elektron küçerelmäläre, internettağı mäğlümat çaraları bar. Anda tatar.ru, tatnews.ru, tatarlar.ru kebek inde tanılğan säxifälär belän bergä, törle häwäskär belgeçlär yasağan, äle küplärgä tanış bulmağan web-bitlärne kürergä bula. Mäsälän, tanılğan tatarlar, muzıka, başqortstan tatarları turındağı internet säxifälärne atarğa mömkin. Törkilär turındağı iñ yaxşı sayt digän tördä, nuğay, qırım tatarları belän bergä uyğırlarnıñ säxifäse dä täqdim itelä. Din turındağı tördä yarış ayıruça qızu bulaçaq, anda 11 säxifä elengän inde. Şunısı qızıq, bu tördä Raifa irlär monostıreneñ häm Qazan yeparxiäseneñ elektron säxifälären dä kürep bula. Yaqınnanraq tanışqaç, bu säxifälärneñ keräşen tatarlarına bağışlanğanın kürdek. Ğarizalarnı qabul itü däwam itä. Bäygeneñ internet adresı tatnet.tatar.info