Accessibility links

шимбә, 10 декабрь 2016, Казан вакыты 06:01

Ğiraqqa humanitar yardäm kiterü arta bara. Pänceşämbedä BMOnıñ xalıqara xezmätkärlären qaytaru başlana


Ğiraqta xärbi çaralarnıñ töp öleşe inde tämamlansa da, küp kenä şähärlärdä wäzğiät äle totrıqlı tügel. Şulay da BMOnıñ humanitar oyışmaları Ğiraqqa azıq-tölek, su häm meditsina kiräk-yaraqları kiterüne arttıra bara. Ğiraqlı xezmätkärlär Törkiä, Küwäyt häm İrannan yardäm kiterü belän şöğellänä. Tizdän biregä xalıqara xezmätkärlär dä qaytıp eşkä kereşäçäk.

Pänceşämbe könne Ğiraqqa BMO xalıqara xezmätkärläreneñ berençe törkeme qaytırğa tieş. Xäzer alar Kiprda AQŞ citäkçelegendäge koalitsiä köçläreneñ Ğiraqqa hawa koridorı açuın kötep tora. 30 keşelek bu törkem ilneñ tönyağındağı Dahuk, Arbil häm Söläymäniä töbäklärenä barıp andağı xalıqnıñ nindi humanitar yardämgä moxtac buluın öyränäçäk.

Bu törkem BMOnıñ Ğiraqqa qaytaçaq 700-läp xalıqara xezmätkärlärneñ berençe öleşen täşkil itä. Alar Ğiraq suğışı başlanır aldınnan neft’ öçen azıq-tölek programması nigezendä eşläwdän alıp qoral tikşerülärenä qädär eşlär belän şöğellänä ide. Suğış başlanır aldannın alar tiz genä Ğiraqtan çığarıldı. BMOnıñ Ğiraqtağı 3400-läp cirle xezmätkäre isä mömkin bulğan yardäm eşlären inde başqarıp kilä.

Xäzerge waqıtta İordaniädä xökümätlärdän bäysez 70-läp humanitar oyışma BMOnıñ Ğiraqtağı wäzğiätne niçek bäyäläwen küzätep, anda iminlek artuın kötep tora. BMOnıñ Humanitar eşlärne koordinatsiäläw idaräse wäkile Oliver Ulich iminlek bulmaw xalıqara agentlıqlarnıñ Ğiraqqa qaytuın totqarlıy di:

AUDİO: Ğiraqta wäzğiät, älbättä, haman da bik nıq totrıqsız, bigräk tä anıñ küp xalıq yäşägän öleşlärendä. Äle bügen Bağdadta küp kenä bäysez oyışmalarnıñ häm Xalıqara qızıl xaç oyışmasınıñ üzlärendä bulğan yardämne iminlek citeşmäw säbäple tarata almıy toruı turında işettek.

Bügen Qatardağı AQŞ üzäk xärbi idaräsendä general Vincent Brooks Mosul şähäreneñ xakimiät binası qarşında kiçäge demonstratsiädä bäreleşlär başlanğaç AQŞ soldatları ut açıp 7 ğiraqlını üterde dip belderde. Mosulda bügen dä bäreleşlär bulıp 3 ğiraqlınıñ üterelüe turında xäbärlär kilde.

Ämma totrıqsızlıqqa qaramastan, Ğiraqqa humanitar yardäm kiterü arta bara. BMOnıñ balalar fodnı UNİCEF häm Dönya Azıq-tölek Oyışması ilneñ tönyağına häm könyağına humanitar yardäm kiterä. UNİCEF Umm Qasr şähären inde 10 kön buyı eçär su belän tä’min itep tora.

Ulich äytüençä, BMO räsmiläre Ğiraqnıñ törle öleşlärendä iminekneñ ni däräcädä buluın öyränüne arttıraçaq. Ul, şulay uq, Xalıqara qızıq xaç oyışması yäki Çiklärne tanımawçı tabiblar oyışması kebek törkemnär ere şähärlärdä koalitsiä köçläre xastaxanälärne talawçılardan saqlawnı arttıra bara dip xäbär itä dide.

Kiçä AQŞ prezidentı George Bush xäzer töp iğtibarnıñ humanitar mäs’älälärgä yünältelüen belderde:

AUDİO: Bez ğiraqlılarğa irekle häm totrıqlı il tözergä yardäm itü kebek awır eşkä kereşäbez. Xäzer tärtip urnaştıru häm azıq-tölek, su, meditsina belän tä’min itü töp mäs’älägä äwerelä.

Xäzer Ğiraqta sälamätlek saqlaw torışı nıq borçılu uyata. Dönya sälamätlek oyışması ilneñ küp kenä öleşlärendä tabiblarnıñ iminlegenä ışanıç bulmaw, su häm darular citmäw, elektr utınıñ özelüe säbäple sanitaria şartları naçarayu, könnärneñ esselänä baruı näticäsendä törle yoğışlı awırular çığuı turında belderä. Citmäsä, Ğiraq xakimiäte cimerelgännän soñ, xalıq başqa binalar belän bergä qayber xastaxanälärne dä talağan ide.

BMOnıñ Humanitar Eşlärne Koordinatsiäläw İdaräse wäkile Ulich tizdän Ğiraqlılarnıñ öylärendäge azıq-tölek betäçäk häm bez kiläse ayda Ğiraqqa bik zur külämdä azıq-tölek kiterä başlıyaçaqbiz dip belderde.

Xäzer Dönya Azıq-tölek oyışması suğışqa qädär neft’ öçen azıq-tölek programması nigezendä eşlägän 44 000 yardäm taratu urınının yañadan açarğa cıyına. Alar ay sayın barlığı 480 000 tonna azıq tarataçaq.

Naif Aqmal, Praga.
XS
SM
MD
LG