Accessibility links

дүшәмбе, 5 декабрь 2016, Казан вакыты 07:41

Bağdadta Säddäm Hösäinneñ yaqın tuğanı Barzan İbrahim al-Tikriti qulğa alınğan


Amerikan xärbiläre Ğiraqtağı İran oppozitsiä törkeme belän atışlarnı tuqtatu turında kileşü qabul itergä tırışa. Qatardağı xärbi idarädä Amerikan generalı Vincent Brooks, Quşma Ştatları ğaskärläre Mujahideen I-Xalq suğışçılarına höcüm itte, dip belderde, läkin kiläse berniçä köndä alar belän tınıçlıq kileşüe tözelüenä ömet bar, dide Brooks. Amerikan köçläre şulay uq tönyaqtağı Mosul şähärendä dä tärtip urnaçtırırğa tırışa. Brooks, “Mosuldağı wazğiätne totrıqlı dip äytep bulmıy. Äle dä şähärdä qanunsızlıq, köç qullanu xökem sörä, häm bolay däwam itergä çaqırular yañğrıy”, dide. Amerikan ğaksärläreneñ üzäk xärbi idaräse Bağdadta Säddäm Hösäinneñ yaqın tuğanı qulğa alındı dip xäbär itte. Ğiraqlılardan alınğan yäşren mäğlümattän faydalanıp Amerikan xärbiläre Barzan İbrahim al-Tikritinı qulğa alğan. Barzan 1979nçe belän 83nçe yıllar arasında Ğiraqnıñ Küzläw Xezmäten citäkläde häm 88nçedän alıp 1997nçe yılğa qadär Ğiraqnıñ Berläşkän Millätlär Oyışmasındağı wäkile ide. Yäkşämbe könne Amerikan xärbiläre Süriä çige buyında Säddämneñ tağın ber yaqın tuğanı Watban İnrahim Hasan al-Tirkitinı qulğa aluların beldergännär ide. Alar ikese dä-Amerika tarafınnan ezlängän Ğiraq räsmiläre isemlegendä ide. Ğiraqtağı koalitsiä köçläre başlığı amerikan generalı Tommy Franks Ğiraqqa yasağan säfärennän soñ-Bağadta tärtip urnaşa baruın belderde häm xärbi kampaniä belän qanäğät qaluın äytte. Kuwaitta jurnalistlar belän oçraşqanda Franks, “Ğiraqlılar problemaların üz östenä ala xäzer” dide. Bağdadta 2 meñ 200 Ğiraq keşese qorallanmağan politsiädä xezmät iter öçen möräcäğät itkän. Franks kontrolendä bulğan ğaskärlär isä xäzer humanitar yardäm mäs’äläläre belän şöğellänä. Berläşkän Millätlär Oyışmasınıñ Dönya Azıq-Tölek Programması wäkilläre, Ğiraqqa Jordaniä aşa 50 yök maşinası yardämneñ kilep citäçägen belderde. Moña qadär humanitar yardäm Ğiraqqa Törkiä aşa ğına kilä ide. Bağdadtan kilgän xäbärlärgä qarağanda, başqala xalqınıñ küpçelegendä su bar, amerikan xärbiläre irtägä qadär şähärneñ yartısın bulsa da elektr belän tä’min itergä süz birä. Farsı Qultığındağı Britan ğaskärläre başlığı, Basra şähärendä su häm elektr utı tä’minatı suğışqa qadär bulğan xälenä qayttı, dup belderde.

XS
SM
MD
LG