Accessibility links

шимбә, 3 декабрь 2016, Казан вакыты 14:52

Toraq-xucalıq reformaları barışında keşe xoquqları iksä alınırmı?


Uzğan xäbäremdä söylägänçä, Tatarstanda keşe xoquqları Komissarı Räşit Wäğizov uzğan yıldağı eşçänlege turında xisap tottı. Anda grajdannarnıñ törle xäkimiät strukturalarına üteneçläre, şiqayätläre arasında sotsial'-iqtisadıy xoquqlarnı yaqlawnı taläp itkännäre prioritetlı ikäne turında näticä yasala. Pänceşämbe könne räsmi mäğlümat çaralarında Räşit Wäğizovnıñ Tatarstan Prezidentına, Däwlät Şurasına, Ministrlar Kabinetına grajdannarnıñ toraq öçen tüläwdä taşlamalarğa xoquqları ütälmäwe turında maxsus möräcäğät yasawı turında äytelä. Süz kübräk xezmät, suğış veterannarı häm alarnıñ ğailäläre turında bara. Läkin Tatarstanda 2002 yılda başlanğan toraq-kommunal' xucalıq reforması barışında barlıq kategoriä grajdannarnıñ da xoquqları bozıldı, dip sanawçılar da bar.

Çärşämbe könne Tatarstan Yuğarı mäxqamäse respublika Ministrlar Kabinetınıñ toraq-kommunal' xezmätkä tariflarnı arttıru turındağı qararın ğamäldän çığaru turındağı eşne qarawnnı 25 aprilgä kiçekterde, dielä räsmi xäbärdä. Monnan berniçä ay elek Qazanda yäşäwçe ber keşe xökümät toraq-kommunal' xezmät öçen nigezle, xaqlı kütärmi dip mäxqamägä däğwä birde. Bu konfliktnı mäğlümat çaraları kütärep aldılar. Xalıq arasında, xätta cirle toraq-kommunal' idarälärenä artıq tülängän aqçalarnı qaytaru öçen, xoquqi yaqtan nigezläp yazılğan ğariza ürnäkläredä tarattılar. Bu xällär, älbättä, xökümät citäkçelärenädä işetelde. Läkin alar andıy däğwaçılarğa yaqtı yöz, ömet çatqısı kürsätülären sizdermädelär. Şulay itep bu qarşılıq däwam itä, ä keşelärgä ay sayın nindider tomanlı “binanı kapital', ağımdağı tözätü, su torbaların täzätü” digän yulları bulğan sölge buyı tüläw qäğäzläre kilä tora. Mäsälän, 80nçe yıllar başında tözelgän 9 qatlı yorttağı 3 bülmäle fatirğa ayğa 670 rublgä xisap kilä. Küpme soñ bu azmı?

XS
SM
MD
LG