Accessibility links

шимбә, 10 декабрь 2016, Казан вакыты 10:01

Mäskäwdä “Liberal Rusiä” citäkçese Sergei Yuşenkov üterelde


Pänceşämbe kiçendä Mäskäwdä üz öye yanında Liberal Rusiä partiäse räistäşe Duma deputatı Sergey Yuşenkov atıp üterelde. Deputatqa 4 tapqır atqan bilgesez keşe qaçıp kitä alğan, üterüneñ säbäpläre älegä bilgesez. Rusiä säyäsätçeläre monı bertawıştan säyäsi üterü dip atadı.

Pänceşämbe könne Liberal Rusiä partiäse Yustitsiä Ministrlığında terkälü ütte. Säğät berdä Natsional qunaqxanäsendä ütkän brifingta partiäneñ räistäşe bulğan Sergei Yuşenkov Liberal Rusiäneñ 53 töbäktä bülekçäläre terkälüwe häm Rusiä qanunnarı nigezendä kiläse saylawlarda qatnaşu xoquqı buluın äytte. Sergeinıñ käyefe yaxşı ide, bu süzlären ul şatlığın yäşermiçä yılmayıp söyläde:

Audio

Şunnan soñ Yuşenkov Dumağa kilä, anda berniçä sägät bulğannan soñ kiçke 6da öyenä qaytıp kitä. 6.40ta anı şoferı yäşägän yortı aldında töşerep qaldıra. Yortnıñ işegen açqanda bilgesez keşe arttan kilep 4 tapqır ata häm qoralın taşlap qaça. Sergei şunduq xäläk bula. Berniçä minuttan urınğa militsiä häm prokuratura citäkçeläre kilep citä. Mäskäw militsiäse başlığı general Vladimir Pronin “bu professional-killer eşe” dip belderä. Mäskäw prokurorı Mixail Avdukov süzlärençä, üterü Yuşenkovnıñ deputat eşçänlege belän bäyle bulırğa mömkin. Sergeinıñ üterelüwe Rusiäneñ säyäsi elitasına şok buldı. Keşe xoquqları öçen köräşkän, prezident Putin häm Çeçen suğışınıñ tänqitçese bulğan 52 yäşlek Yuşenkov Rusiäneñ iñ kürenekle säyäsätçeläreneñ berse ide. Tarafdarları da köndäşläre dä anıñ eçkersez, säf keşe buluı turında söyli. Rusiä säyästçeläre monı bertawıştan säyäsi üterü dip atadı. Sergeinıñ firqädäşe Boris Zolotuxin:

Audio

Xärbi uçilişe, akademiä betergän, annarı şunda marksistik filosofiä uqıtqan polkovnik häm fälsäfä fännäre kandidatı Sergei Yuşenkov 90-nçı yıllar başında Rusiäneñ demokratik xäräkätenä nigez saluçılarnıñ berse ide. Respublikan partiäse citäkçese Vladimir Lysenko da monı säyäsi üterü dip atadı:

Audio

İke yıl elek Sergei Yuşenkov berniçä tarafdarı belän SPStan çığıp Liberal Rusiä digän yaña firqä tözede. Finans yärdämne tanılğan eşquar Boris Berezovski kürsätte. Soñraq Berezovski sul köçelär belän söyläşülär başlağannan soñ Yuşenkov anıñ belän araların özde, häm partiäneñ qorıltayında Berezovski firqädän çığarıldı. Rusiäneñ qayber säyäsätşeläre monı faciğa säbäpläreneñ berse bulırğa mömkin digän fikerlär äytte. Kiçä NTV televidenieseneñ turı efirında Berezovski bu farazlarnı kire qaqtı häm faciğäneñ ezlären Mäskäwdä ezlärgä kiñäş itte. Bu färmannı kem birgänen minem dä beläsem kilä. Maqsatlar küp, läkin berse ap-açıq – Kreml cämğiätne qurqıtırğa, säylawlarda döres itep tawış birdertergä teli dide oligarx. Rusiä prezidentınıñ matbuğat üzäge Putinnıñ, Yuşenkovnıñ üterelü xäbärenä tetränüwe turında xäbär itte. Comğa irtäsendä Duma räise Genadi Seleznev monı teror ğämäle dip atadı häm utırışnı Sergeinı iskä aludan başladı:

Audio

Deputatlar qaynar çığışlar yasadı. Kompartiä wäkile İvan Nikitçuk prezident Putinnı Dumağa çaqırtıp, il belän kem idarä itä, mafiäme, prezidentmı digän soraw birergä täqdim itte. Sergeinıñ firqädäşe Viktor Poxmelkin deputatlarğa möräcägät itep, bu faciğädän üzlärenä PR yasamaqa ütende. Yşenkovnıñ üterlüwe östennän cinäyät eşe açıldı. Bu eşne general prokuror üze kontrol itäçäk dielä. Tik menä belgeçlär bu eşneñ dä açılaçağına ömetlänmi. Yuşenkov – soñğı 9 yıl eçendä Rusiädä üterelgän 9-nçe deputat buldı. Moñarşı bulğan cinäyätlärneñ berse dä, şul isäptän Galina Starovoytovanıñ üterelüwe älegäçä açılmağan. 8 ay elek Sergeinıñ firqädäşe Vladimir Golovlev üterelgän ide. Bu eş şulay uq açılmağan, gärçä anıñ artında Golovlevnıñ Çiläbe ölkäsendä eşlägändä xosusıylaştıru waqıtında qılğan ğämälläre tora digän farazlar bulsa da. Qayber küzätçelär fikerençä, Yuşenkovnıñ eşen şuşı eş belän bäylärgä mömkinnär. Ämmä Sergeinı yaxşı belän keşelär, anıñ berqayçan da aqça belän qızıqsınmağanı turında äytä. Häm bu üterüne säyäsi üterü dip bäyäli. Yabloko citäkçese Grigori Yavlinski:

Audio

Niçek kenä bulmasın, şuşı waqiğa Rusiädä säyäsätçe bulunıñ xaman da quqrınıç professiä bulıp qaluwın rasladı. Küzätüçelär äytüençä, Putin korrupsiäne beterü, ildä tärtip urnaştıru şiğäre belän kilsä dä, wazğiät ällä ni üzgärmi. Sergei Yuşenkov yäkşämbe könne Mäskäwdä cirlänäçäk.

Ali Gilmi, Praga
XS
SM
MD
LG