Accessibility links

шимбә, 10 декабрь 2016, Казан вакыты 17:41

Ğiraq kördläre amerikan ğaskärlärenä Baath partiäseneñ yuğarı räsmi wäkile äl-Najimnı tapşırğan


Bügen Amerika Quşma Ştataları tarafınnan ezlängän 55 Ğiraq räsmie isemlegendä bulğan 4nçe keşe qulğa alınğan. Baath partiäseneñ yuğarı räsmi wäkile Samir Abd al-Aziz al-Najim isemle bu keşene tönyaqtağı Mosul şähärendä amerikan ğaskärlärenä Ğiraq kördläre tapşırğan. “Kiçä kördlär tarafınnan tapşırılıp Quşma Ştatlar ğaskärlärenä birelgän keşe çınnan da Ğiraq rejimı citäkçeläreneñ berse. Xäzer ul koalitsiä köçläre kontrolendä,” dip belderde Amerikan ğaskärläre wäkile general Vincent Brooks. Al-Najim –könçığış Bağdadtağı Baath partiäse bülekçäse başlığı ide. Moña qadär ul şulay uq neft ministrı häm 1991nçe yılğı Farsı qultığı suğışınnan soñ berniçä yıl Säddäm xakimiäte başlığı bulıp eşlägän. Amerikan ğaskärläre bügen Bağdadtan 120 çaqrım yıraqlıqta bulğan Samarra şähäre yanında Säddäm Hösäin köçlärenä höcüm itep 8 xärbi maşinanı yuq itkän häm 30 Ğiraq suğışçısın qulğa alğan. Brooks süzlärenä qarağanda Ğiraq xastaxanäläre eşe dä cayğa salına bara. Başqalada Abu Hanifa mäçetendä comğa namazınnan soñ berniçä meñ keşe Ğiraqtağı Amerika Quşma Ştatlar xärbilärenä qarşılıq belderep uramnarğa çıqtı. Şiği möselmannarınıñ oppozitsiädäge iñ zur törkeme başlığı Ayatollah Möhammäd Baqır äl-Hakim, sişämbe könne möselmannarnı izge Karbala şähärenä cıyılıp Amerika Quşma Ştatları tarafınnan köçläp tağılğan Ğiraqnıñ waqıtlı xökümätenä qarşılıq belderergä çaqırdı. Meñlägän şiği möselmanı bügen ük Karbalağa kitte, dip xäbär itelä. Amerikan xärbi köçläre 5 millionlıq xalqı bulğan Ğiraq başqalasınıñ yartısın bulsa da elektr utı belän bügen ük tä’min itergä cıyına. Ğiraqta küpläp üterü qoralı ezläw, şulay uq Säddäm Hösäin keşeläre häm Mili Muzeydan urlanğan tarixi äsärlärne ezläw eşendä dä Quşma Ştatlar xärbiläre qatnaşa. Kiçä Quşma Ştatlar saqlanu ministrı Donald Rumsfeld, Amerikan köçläre küpläp üterü qoralların tabu öçen Ğiraq xalqı yardämenä moxtac dip belderde. Berläşkän Millätlär Oyışmasınıñ qoral tikşerüçeläre başlığı Hans Blix-inspektorlarğa Ğiraqqa qaytırğa mämkinlek tudırılsa-tikşerülär ışanıçlıraq bulır ide, dide. Amerikan wäkilläre belderüençä, qoral inspekotarlarınıñ Ğiraqqa qaytuları turında söyläşülär uzdırırğa äle waqıt bulmağan. Rusiä xökümäteneñ Ğiraqnı tözekländerü eşendä Berläşkän Millätlär Oyışması töp rol uynarğa tieş digän qararın bügen Däwlät Duması da xupladı. Utırışqa qatnaşqan 390 deputatnıñ barısı da deklaratsiäne yaqlap tawış birde. Deklaratsiädä şulay uq, Ğiraqnı tözekländerügä kitäçäk aqçanı Amerika Quşma Ştatları citäkçelegendäge koalitsiä köçläre birergä tieş, dielä. Rusiä deputatları, Quşma Ştatlarnıñ Ğiraqqa kertelgän çikläwlärne beterü turındağı täqdime İminlek Şurasında kiçekmästän tikşerelergä tieş dip sanıy. Belderüdä şulay uq, Ğiraqnıñ küpläp üterü qoralına iä bulğanın qoral inspektorları ğına belä ala dielä. Rusiä deputatları Ğiraqta tınıç xalıq häm jurbalistlarnıñ üterelüen tikşerergä çaqırdı.

XS
SM
MD
LG