Accessibility links

Кайнар хәбәр

Ğiraqnıñ elekke Finans ministrı qulğa alındı


Ğiraq politsiäse Ğiraqnıñ elekke Finans ministrı Xikmät Äl-Azzawinı qulğa alıp amerikan xärbilärenä tapşırğan. Bu turıda bügen Amerikanıñ Qatardağı üzäk idaräse xäbär itte. Vitse-premier Äl-Azzawi Quşma Ştatlar tarafınnan ezlängän Ğiraq räsmiläre isemlegendä ide. Bu isemlektä barlığı 55 keşe bar. Şularnıñ 5-se xäzer amerikannar qulında. Elegräk körd suğışçıları Mosul tiräsendä elekke Neft ministrı häm Baath partiäse citäkçeläreneñ berse Äbdel-Aziz Äl-Näcmine qulğa alğan ide.

Bügen Riadta ütkän oçraşuda Ğiraqnıñ kürşe illäre Amerikan häm Britan xärbilären Ğiraqtan kitergä çaqırdı. Bu oçraşuda Söğüd Ğäräpstanı, Küwäyt, Süriä, İordania, Törkiä, İran häm şulay uq Bahrein belän Misır Tışqı eşlär ministrları qatnaştı. Ministrlarnıñ urtaq belderüendä äytelgänçä, Ğiraq xalqı üz ile belän üze idarä itergä, ä ilne tözekländerüdä töp rolne BMO başqarırğa tieş. Ministrlar şulay uq Quşma Ştatlarnıñ Süriägä yanawlarına tänqit belderde. Waşington Süriäne Ğiraq rejimı wäkillären sıyındıruda häm ximik qoral citeşterüdä ğäyepli. Süriä bu ğäyepläwlärne kire qağa.

Ğiraq başqalasın aluda qatnaşqan diñgez pexotası bügen Bagdatan kitä başladı. Alarnıñ urının Quşma Ştatlarnıñ ğadi xärbiläre alaçaq. Bu xärbilär şähärdä tärtip urnaştıru, su häm elektr sistemasın erätläw belän şögellänäçäk. 5 millionlı Bagdad qalası menä inde 10 kön elektrsız utıra. Kibetlärneñ kübese eşlämi, ämmä avtobuslar inde yöri başladı, yul politsiäseneñ ber öleşe eşkä çıqtı. Bügen yözlägän ğiraqlı eşkä çığu turında xäbär ezläp xökümät binalarına ağıldı. Amerikan xärbiläre anda tärtip saqlarğa tırıştı. Bügen Bagdadqa İordaniädän BMOnıñ azıq-tölek qärwanı kilde. Amerikan xärbiläre äytüençä, malnı taratu öçen cawaplı keşelär bilgelängänçe, ul saq astında toraçaq.
XS
SM
MD
LG