Accessibility links

шимбә, 3 декабрь 2016, Казан вакыты 16:44

Qıtay xakimiätläre Pekiñda SARS awıruı turındağı sannarnıñ kimetelep kürsätelgän buluın tanıdı


Yäkşämbe könne Qıtay xakimiätläre qurqınıçlı yaña tör üpkä yalqınsınuı yäğni SARS awıruı oçraqlarınıñ başqala Pekiñda elegräk iğlan itelgännän un märtäb kübräk buluın belderde. Moñarçı awırular sanınıñ kimetelep kürsätelüe öçen sälamätlek ministrı häm şähär merı Qıtay Komminstlar Partiäsennän çığarıldı. Mer Meñ Ksuenoñ wazıyfasınnan da töşerelde. Qıtay xakimiätläre ber ük waqıtta bu awıruğa qarşı yaña çaralar iğlan itte.

Qıtay sälamätlek ministrı urınbasarı Gao Qiañ televidenie aşa bar ilgä kürsätelgän matbuğat oçraşuında comğa könne Pekiñda barlığı 339 keşedä SARS awıruı buluın, 18 keşeneñ ülüen häm tağın 402 keşeneñ awıru bulırğa mömkin dip sanaluın iğlan itte. Berniçä kön elek kenä Pekiñda 37 keşeneñ awıruı, 4 keşeneñ ülüe turında äytelgän ide. Dönya Sälamätlek Oyışması ul çaqta uq bu sannarnıñ çınbarlıqqa turı kilüenä şik belderep, Pekiñda 100-200 awıru bulırğa mömkin dip belderde. Şulay itep, moñarçı sannarnıñ 10 märtäbä diärlek kimetelep kürsätelüe açıqlandı. Şimbä könne Pekiñda tağın 7 keşedä SARS virusı tabıluı, 2 keşeneñ ülüe mäğlüm buldı. İlkülämendä alğanda, comğa mäğlümätläre barlığı 1807 awıru oçrağı buluın, şulardan 79-ınıñ ülüen kürsätte.

Qıtay xakimiätläre bu awıruğa qaşrı çara bularaq bıyılğı May bäyräme yalların da qısqarttı. Ğädättä Qıtayda may başında 1 atna buyı däwam itkän yal 1 köngä genä qaldırıldı. Bıltır Qıtayda May bäyrämnärendä 70-läp million keşe yal säfärenä kitkän ide. Şul qädär küp xalıqnıñ il buylap xäräkäte SARS awıruın ilneñ başqa urınnarına da taratırğa mömkin.

Sälamätlık saqlaw ministrı urınbasarı Gao Pekiñda awırular sanınıñ küp märtäbä azraq itep kürsätelüen tögäl sannarnıñ yuğarı citäkçelärgä waqıtında xäbär itelmäwe belän bäyläp añlattı. Gao yalğan sannar birüdä ğäyepläwdän tıyılıp qalıp, kübräk wazıyfalarnıñ tieşençä başqarılmawı, xatalar turında söyläde. Ul üz çığışında qayber xastaxanälärneñ maxsus räweştä yalğan sannar birüen dälilläwçe xäbärlärgä tuqtalıp tormadı.

Qayber küzätüçelär sälamätlek ministrı Jañ Wenkañ belän şähär merı Meñ Ksuenoñnıñ partiädän çığarıluın xakimiätlärneñ il xalqında ışanıçnı arttıru tırışlığı bularaq sürätli. Uzğan közdä partiä citäkçelegenä kilgän häm mart ayında parlamentta Qıtay prezidentı itep saylanğan Hu Jintao häm premyer-ministr Wen Jiabao xakimiätlärgä ışanıçnı arttıru öçen uzğan atnada SARS awıruı qurqınıçı turında çañ suğunı arttırıp räsmilärne awıru oçraqların yäşermäskä çaqırdı. Qayber küzätüçelär xäzer qıtay xalqında xakimiätlärgä ışanmaw 1989-nçı yılda Tiananmen mäydanında yözlärçä demonstratsiäçeneñ atıp üterelüennän soñ bulğan däräcägä yaqınlaşıp kilä dip SARSnıñ säyäsi tä’sire turında da kisätä.

Pekiñda döres sannar birügä qomaçawlawçı töp xata küp awırularnıñ xärbi xastaxanälärdä buluı näticäsendä kilep çıqqan. Xärbi xastaxanälärgä xärbi bulmağan keşelärne dä alğannar, ämma alar turında mäğlümätlär ğömümi xisapqa kertelmägän. Gao äytüençä, Pekiñdağı awrularnıñ 60 protsenttan artığı xärbi xastaxanälärgä turı kilä. Monıñ ni öçen şulay buluın xakimiätlär añlatıp birmi. Ämma bu awırular räsmi xisaplarğa kertelmäs öçen maxsus räweştä xärbi xastaxanälärgä cibärelgän bulırğa mömkin digän şik uyata.

Naif Aqmal, Praga.
XS
SM
MD
LG