Qıtay räsmiläre ildä tağın 100gä yaqın keşe üpkä yalqınsınuınıñ yaña tören yoqtırdı, ike keşe ülde, dip xäbär itte. Kiçä SARS virusın yoqtıruçılar sanı 346 dip xäbär itelgän ide. Pekin şähär başlığı Meng Xuenong, şähärdä virusnıñ taraluına qarşı ber nindi dä çara kürä almağanı öçen wazifasınnan alınğan. Bu xaqta Qıtaynıñ däwlät mäğlümat çaraları xäbär itte. Şulay uq kiçä Qıtaynıñ sälämätlek saqlaw ministrı häm Pekin merınıñ kommunist firqasendäge wazifalarınnan alınuı mäğlüm buldı. SARS virusı dönya buylap 200 keşeneñ ğömeren özde, 3 800dän artıq keşe pnevmoniäneñ bu yaña töre belän awırıy. Hong Kongta atna azağında SARS çirennän 19 keşe ülgän, bu şähärdä ülüçelär sanı 88gä citte. 3 atna buyına eşlämägän Hong Kong uqu yortları irtägä açıla, läkin uquçılarğa virustan saqlanır öçen bitleklär kiergä quşılğan.
SARS virusına qarşı köräşne Tönyaq Korea da başladı. Hawa alannarında häm cämäğätçelek urınnarında östämä tikşerülär häm saqlanu çaraları kürelä, SARSqa qarşı köräş kampaniäseneñ baş-fatirı buldırıldı.
