Accessibility links

Кайнар хәбәр

Ğiraq suğışınıñ tämamlanuı il xalqınıñ 60-lap protsentın täşkil itkän şiği möselmannarnıñ xac yolası könnärenä turı kilä


Säddam Xösäin xakimiäteneñ cimerelüe bıyıl Ğiraqta yözlärçä meñ şiğinı soñğı 3 distä yıl eçendä berençe märtäbä Kerbala şähärendäge İmam Xösäin bin Ali qäberlegendä xac qıluğa ruxlandırdı.

Bu atnada Ğiraqtağı yözlärçä meñ keşe şiği möselmannarnıñ izge şähärlärennän berse Kebalağa ağıla. Ölkännär häm balalar yök maşinalarına, avtobuslarğa töyälep kilsä, yäşräk ir-atlar häm xatın qızlar ozın yulnı cäyäwläp ütä. Çärşämbe könne biredä 14 ğasır elek Möxämmät päyğämbär onığı İmam Xäsäinneñ üterelüen kiñküläm ğibadät belän iskä alaçaqlar. Ğiraq xalqın Yazid bin Muawya cäber-zolımınnan qotqarığa kilgäç Tuff suğışında İmam Xösäin belän anıñ bertuğanı Abbas ta hälak bula.

30 yıl däwam itkän ezärlekläwlärdän soñ bügen Ğiraqta milionnarça şiği möselman din irege kilüdän tirän dulqınlanu xisläre kiçerä, İmam Xösäin sürätlären kütärgän küpsanlı keşelär Kerbalağı iltüçe yullarnı tutıra. Alar İmam Xösäin kiçergän ülem ğazapların toyu öçen yalan ayaq atlıy, yulda üz-üzlären çılbırlar belan qıynıy. Säddam Xösäin xakimiäte çorında şiğilarnıñ mondıy yolası tıyılğan ide. Tuzanğa-pıçraqqa batıp, kibegep, berniçä kön yoqısız yul ğazapları kiçerep İmam Xösäin qäberenä kilep citkännän soñ alar andağı mäcet işegen häm İmam Xösäinneñ qäber taşın übälär häm şunnan soñ üzlären yañadan xäl kergändäy xis itälär.

Şuşı yolağa kilgän yäş şiğilarnıñ berse bezneñ xäbärçebezgä cäyäwläp 130 çaqrım yul ütüen belderde. Ul İmam Xösäinneñ üleme belän äle genä tämamlanğan suğış arasında zur oxşaşlıq kürüen äytep, bu suğışlarnıñ ikese dä zalimnärdän qotqaru öçen buldı di:

AUDİO: İmam Xösäin diktaturağa qarşı çığuçı berençe citäkçe bulğan. Ul izge häm cir yözendä Möxämmät päyğämbärdän qala iñ ğädel keşe bulğan.

Xäzer Säddamnan soñğı çornıñ berençe cimeşlären tatısalar da Kerbalağa kilüçelärneñ kübese Quşma Ştatlarğa şik belän qarıy. Alarnıñ küpçelege Amerikannar xäzer üzläreneñ Ğiraqnı basıp aluçı tügel, ä azat itüçe buluların raslarğa tieş di:

AUDİO: Ägär alar azat itüçe ikän, ul çaqta bez bik şat häm qänäğät bulırbız. Ämma ägär dä alar basıp aluçı ikän bu bezneñ küñelebezne töşeräçäk häm bez alarğa qarşılıq kürsätäçäkbez.

İmam Xösäin ğibadätxanäsenä kilüçelär aldağı aylarda häm atnalarda amerikannarnıñ kem buluı häm Ğiraqqa nik kilüe açıqlanaçaq dip isäpläwe turında belderä. Ägär dä ala xakimiätne Ğiraqlılarğa tapşırıp ilneñ baylıqların mondağı xalıqqa qaldırsa alar üz niätläreneñ izge buluın raslağan sanalaçaq. Şul uq waqıtta qayber şiğilar koalitsiä köçläreneñ xäzer ük kitüen taläp itä häm Ğiraqta İslam däwläte oyıştırırğa çaqıra:

AUDİO: Bez Ğiraqta İslamçı citäkçe buluın telibez, amerikannarnı xuplamıybız. Bez Säddamnıñ da amerikalılarnıñ da citäkçelegen telämibez, ikese dä kyäferlär.

Şatlıq xisläre belän bergä Kerbalağa kilgän xacilar arasında Säddamnan qurqu xise äle däwam itä. Biredä soñğı könnärdä berniçä keşeneñ ülüe, berniçäseneñ awıruı turında xäbärlär taraldı. Ägär ülüçelär häm awırular çınnan da bar ikän, berençe çiratta monı qızu hawa häm naçar higiena şartları belän añlatu döresräk bulır ide. Ämma xacilarnıñ kübese Säddam xac yolasın özü öçen şiğilarnıñ aşın ağularğa quşqan dip isäpli.

Naif Aqmal, Praga.
XS
SM
MD
LG