Accessibility links

якшәмбе, 4 декабрь 2016, Казан вакыты 19:31

Tatarstan Yaponiä iqtisatçılarında qızıqsınu uyatqan


Neft'kä kilgändä, 12-15 aprel' könnärendä, Tatarstan Premyer-ministrı Röstäm Miñnexanov citäklägän delegatsiä Yaponiädä bulıp qayttı. Älege eşlekle delegatsiä sostavında Tatarstan Säwdä häm tışqı iqtisadıy bağlanışlar ministrı Xafiz Salixov, “Tübän Qama neftexim” açıq aksionerlıq cämğıäte general' direktorı Vladimir Busığin, “Tatnefteximinvest-xolding” açıq aksionerlıq cämğiäte general' direktorı Rafinat Yärullin häm başqa belgeçlär bar ide. Sişämbe könne Xafiz Salixov häm Rafinat Yärullin Yaponiägä baru näticäläre belän tanıştırdı.

Ministr Xafiz Salixov Yaponiäneñ dönya iqtisatında totqan rolenä zur bäyälämä birep, delegatsiä tanışqan “Mitsui” kompaniäseneñ eşçänlege belän qısqaça ğına tanıştırıp uzdı. “Mitsui” kompaniäse Yaponiä nefteximiä citeşterü tarmağınıñ liderlarınnan isäplänä häm anıñ yıllıq säwdä äyläneşe 200 milliard dollar täşkil itä.

Ğomumän, Tatarstan Yaponiä iqtisatçılarında qızıqsınu uyatqan häm Xirosima şähäre prefektı kiläçäktä respublika belän iqtisadi häm mädäni bağlanışlar ölkäsendä xezmättäşlek urnaştıru telägen beldergän. Ministr süzlärenä qarağanda, Yaponiä Tatarstannıñ tışqı iqtisadıy xezmättäşläre arasında säwdä äyläneşe buyınça 18 urında tora häm ul yılına 15-18 million dollar külämendä bäyälänä.

Xäzerge waqıtta, Tatarstan häm Rossiä külämendä polipropilen çimalın citeşterügä ixtıäc zur. Bu çimal ber tapqır qullanıla torğan ğadi stakan citeşterüdän alıp, tözeleş häm maşina citeşterü tarmağına qädär faydalanıla. “Tatnefteximinvest-xolding” polipropilen citeşterü külämen yılına 120 meñ tonnağa qädär citkerü maqsatınnan çığıp, 100-130 million dollarlıq investitsiä proyektı tözegän. Älege proekt belän Yaponiäneñ “Mitsui” häm İtaliäneñ “Bazel'” kompaniäläre qızıqsınğan. Tatarstan delegatsiäseneñ Yaponiägä baru maqsatı da şuşı proyektnı tormışqa aşıru omtılışlarınnan çığıp başqarılğan. Älege proyektnı tormışqa aşıruda üz yärdämen täqdim itkän ike kompaniä arasında qaysısı saylanğanlığı may aylarında mäğlüm bulaçaq häm yün-yül aylarında xezmättäşlek kileşüe tözeläçäk. Proyekt uñışlı ğına eşläp kitkän oçraqta, respublika totaçaq çığımnarnı 4 yılda aqlap, kiläçäktä polipropilen citeşterü külämen yılına 180 meñ tonnağa qädär citkerergä faraz qıla.

XS
SM
MD
LG