Accessibility links

якшәмбе, 11 декабрь 2016, Казан вакыты 01:19

Rim Papasınıñ Qazanğa kilüe turında yañadan söylilär


Tatarstannıñ qayber rayonnarında çäçügä töştelär, disäm, aptıramassız. Qazan vertoletların Hindstanğa satu da ğäcäpländermäs sezne. Rusiäneñ Konstitutsion mäxkämäse yäki prokuraturası, Däwlät Duması Tatarstannıñ kikeregen şiñderer öçen tağın ber qarar qabul itkän, disäm dä – bu sezneñ öçen yañalıq bulmas. Kön sayın, atna sayın bula andıy xällär. Xätta, prezident Mintimer Şäymievnıñ Federatsiä Sovetındağı wäkile Altınbayıvnı çaqırtıp alıp, anıñ urınına başqa keşene bilgeläw dä ğädäti ber texnik häm yarım-säyäsi barmaq selketü. Dönyanıñ häm xalıqnıñ moña ise kitmi.

Ä menä Vatikanda utıruçı Rim Papası, bötendönya katoliklarnıñ başlığı İoan Pawel II olı başın keçe itep Tatarstanğa kilep, qayçandır yuğalğan Qazan Bogomater' ikonasın kertü mömkinlege dönya cämäğätçelegeneñ iğtibarın cälep itkän. Belmägännär belep torsın, katoliklar başlığınıñ Rusiägä kilüenä qarşı rus pravoslav çirkäwe başlığı Aleksiy II Rim Papasın üz bilämälärenä kertergä telämi. Şulay da, avgust ayında Rim Papası Mongoliägä barğanda, Qazan hawa mäydanına tuqtap, älege ataqlı ikonanı tapşırırğa cıyına digän xäbär inqar itelmi. İtaliä premyer-ministrı Berluskoni bu vizitnı buldıru turında xästärläp, nindider çığış yasağan. Rusiä xökümäte başlığı Kas'yanov ta bu eşkä bitaraf tügel. Xäzer inde Vladimir Putin niçek tä Aleksiy II belän eşne caylasa, räsmi räweştä Mäskäwgä häm Rusiägä kermägän Rim Papasınıñ Tatarstan Möstäqillege könenä büläk kiterü forsatı arta töşkän. Ämma şulay da, xäl axırğaça açıq tügel. Berençedän, xäzerge zamanda xalıqara wäzğıät üzgärep tora. Olı keşeneñ sälämätlege häm käyefe dä üzgärüçän. Ägär dä bu tarixi waqiğa bula qalsa, turistlar öçen qızıqlı yadkär Qazannıñ abruyın arttıraçaq. Törki möselmannar öçen bu älläni zur tabış tügel ikänlegen äytep tä tormıybız. Şulay da, Qazan törle dinnär häm millätlär öçen uñaylı ber märkäz bulıp tanılsa, berkemgä dä zıyan tügel.

XS
SM
MD
LG