Accessibility links

Кайнар хәбәр

Tel Aviv şähäreneñ poezd stansiäsendä intixar terrorçısı üz üzen şartlattı


Fälestin intixar terrorçısı Tel Avivnıñ tönyağındağı poezd stansiäsendä üze belän tağın ber İsrael keşesen şartlattı. Kimendä 12 keşe yaralanğan. Soñğı ayda İsraeldä berençe terror ğamäle buldı. Bu höcüm öçen cawaplılıqnı Arafatnıñ Fatah xäräkäteneñ ber qanatı bulğan Al-Aqsa intixarçılar brigadası üz östenä aldı. İsrael ğaskärläre Könbatış Yarda Ramallahnıñ tönyaqkönbatışındağı awılğa kerep ike fälestin keşesen atıp üterde. Kiçä genä Arafatnıñ häm yaña bilgelängän premyer-ministr Mahmud Abbasnıñ yaña Fälestin xökümäte mäs’äläsendä kileşkän buluı xäbär itelde. İsrael tışqı eşlär ministrı Silvan Şalom, yaña Fälestin xökümäteneñ terrorğa qarşı köräşäçägenä ömetlänüen belderde. Amerika Quşma Ştatları häm Rusiä kiçäge kileşüne xuplap çıqtı, anıñ, Fälestin däwläten tözüdä möhim adım bulğanın belderde. Fälestinnärneñ mäğlümat häm mädäniät ministrı Yasser Abed Rabbo, terror höcümen täñqitläde, läkin mondıy ğamällär öçen İsrael xökümäte dä cawaplı dip belderde. “Höcümne kisken täñqitlibez, bez tınıç xalıqqa höcüm itügä qarşı. Şul uq waqıtta, İsrael xökümäte dä mondıy höcümnär öçen cawap totırğa tieş. Soñğı atnalarda alar distälägän fälestinne üterde, yortların cimerde, infrastrukturanı yuq itte, yäşäwebezne çıdıy almaslıq tormışqa äyländerde” dip belderde Rabbo. Fälestinnär citäkçese Yasser Arafat terror höcümen dä , ike fälestin keşeseneñ üterelüen dä kisken täñqitläp çıqtı.
XS
SM
MD
LG