Accessibility links

якшәмбе, 11 декабрь 2016, Казан вакыты 01:28

Bağdadta elekke Ğiraq premyer-ministr urınbasarı Tariq Aziz AQŞ ğaskärlärenä birelde


Amerika Quşma Ştatları xärbi köçläreneñ Qatardağı üzäk idaräse Amerikan ğaskärlärenä Ğiraqnıñ elekke premyer-ministrı urınbasarı Tareq Aziz birelde, dip belderde. Quşma Ştatları iğlan itkän isemlektäge 55 keşeneñ 43e-qulğa alınğan ide. Tareq Azizdan bügen elekke prezident Säddäm Hösiänneñ qayda bulğanı turında soraw da alınğan. Londonda Britaniä Tışqı Eşlär Ministrı Jack Straw Aziznıñ üz teläge belän ğaskärlärgä birelüen xupladı. Aziz häm başqa Ğiraq räsmiläreneñ Säddäm rejimı turında möhim mäğlümat biräçägenä ışanuın äytte Jack Straw. Britaniä ministrı süzlärenä qarağanda Ğiraqta älegä qadär küpläp üterü qorallarınıñ tabılmawı-Quşma Ştatları citäkçelegendäge koalitsiäneñ Säddäm rejimı qurqınıçın arttırıp kürsätergä teläwen añlatmıy. Amerika Quşma Ştatları prezidentı George Bush kiçä yasağan çığışında, Ğiraqta küpläp üterü qoralınıñ tabılaçağına ışanuın belderde, läkin alarnı Säddäm rejimı keşeläreneñ yuq itüe ixtimal, dide Bush. Bügen şulay uq könbatış mäğlümat agentlıqları, Ğiraqnıñ Tunistağı elekke ilçese Faroud Hicazi Süriä çige buyında qulğa alınğan, dip xäbär itte. Hicazi 90nçı yıllar urtasında Ğiraq küzläw xezmäteneñ tışqı eşlär bülegen citäkçlägän. Amerika Quşma Ştatları tarafınnan ezlängän 55 Ğiraq räsmie isemlegendä Hicazi yuq, qayber amerikan räsmiläre anıñ 5 yıl elek Kandaharda Osama bin Laden belän oçraşqan buluın farazlıy. Berläşkän Millätlär Oyışmasınıñ qaçaqlar agentlığı Ğiraq qaçaqlarınıñ kire öylärenä qaytuların oyıştırırğa cıyına. Distälärçä yıl çittä yäşägän yartı million Ğiraqlığa oyışma kire qaytırğa yardäm itä alaçaq. Bu xaqta komitetnıñ matbuğat wäkile Ron Redmond belderde. Möhacirlärneñ qaytuı-ildä fizik häm qanuni iminlek buldırılğaç mämkin bulaçaq.İranda häm başqa kürşe däwlätlärdä 165 meñgä yaqın Ğiraq keşese yäşi dip isäplänä. 240 meñ-Jordaniädä häm Süriädä. Oyışma xezmätkärläre şulay uq-başqa illärdän 60 meñ tiräse häm könbatıştan 35 meñgä yaqın keşe qaytır dip farazlıy.

XS
SM
MD
LG