Accessibility links

якшәмбе, 11 декабрь 2016, Казан вакыты 13:11

Möxämmätşin – säyäxättä


Bu arada Tatarstan Däwlät Şurası räise Färit Möxämmätşin könaralaş Mäskäw yulın taptıy. Eş şunda ki, ul Rusiä prezidentınıñ xoquq idäräse citäkçese Larisa Brıçeva belän Tatarstannıñ Federal' üzäk arasında wäqälätlär büleşü turındağı kileşü östendä eşli. Kiñ cämäğätçelekkä anıñ eçtälege äle mäğlüm tügel, läkin ber närsä açıq: älbättä, bu kileşü 1994 yılğı dokumentqa oxşaş bulmas. Federal' üzäk wäqälätlär bülgän çaqta berençe çiratta üz mänfäğätlärennän çığıp eş itäçäk. Çeçnyada uzğan referendumğa qädär Mäskäw töbäk-üzäk kileşülären ğämäldän çığaru belän aktiv şöğellänep kilde. Läkin tınğısız respublikağa taşlama yasawğa, Tatarstan ”Ä bez alardan kimmeni soñ?” digän fikerne alğa sörep, mäs’äläne Mäskäw aldında qıyuraq quya başladı. Uzğan atnada Färit Möxämmätşin Tatarstan parlamentına saylawlar mäs’äläsenä dä beraz açıqlıq kertte. Alarnıñ waqıtınnan alda uzaçağı inde xäl itelgän närsä ikän. Datası älegä bilgelänmägän: yä bıyıl dekaberdä, yä kiläse yılnıñ martında. Parlamentta niçä palata bulaçağı da yaqın arada açıqlanaçaq. İke palatalı parlamentqa bezneñ citäkçelek ömet belän qarasa da, Mäskäw anı ügi balanı xörmät itkän kebek kenä qabul itä ikän.

XS
SM
MD
LG