Accessibility links

җомга, 9 декабрь 2016, Казан вакыты 03:17

Amerikan saqlanu ministrı Berläşkän Ğäräp Ämirlekläre citäkçeläre belän oçraştı


Abu Dabu. Amerika Quşma Ştatlarınıñ saqlanu ministrı Donald Rumsfeld bügen Berläşkän Ğäräp Ämirlekläre citäkçeläre belän oçraşıp, alarğa Ğiraq mäs’äläsendä Waşingtonnı yaqlawı öçen räxmät belderde. Ministr alar belän şulay uq amerikan ğäskärläreneñ Farsı qultığında qalu mäs’äläsen dä tikşerde. Donald Rumsfeld Abu-Dabigä aldan qaralğanğa berniçä säğät soñğa qalıp kilde, İrlandiädä tuqtap alu waqıtında ul utırğan oçqıçta mexanik citeşsezlek tabılğan ide. Şul säbäple Rumsfeld elek planlaştırılğan Äfğanstan säfärennän waz kiçte, läkin amerikan wäkilläre äytüwençä ul Qabulğa kiläse atna azaqlarında barıp çığarğa cıyına. Bügen Quşma Ştatlarnıñ saqlanu ministrı şulay uq Farsı qultığında urnaşqan Qatarğa oça, anda anıñ İraq suğışın alıp barğan amerikan generalı Tommy Franks belän oçraşuwı qaralğan. Rumsfeld elegräk, Saddam xakimiaten bärep töşergännän soñ Quşma Ştatlar Farsı qultığındağı ğäskäri qüwäten kimetergä uylap tora dip beldergän ide. General Franks bügen, Ğiraq suğışınnan soñ töbäktäge amerikan köçlärendä üzgäreşlär bula ala, läkin bu hiçkenä dä alarnıñ sanın kimetüne añlatmıy digän süzlär äytte.

XS
SM
MD
LG