Accessibility links

җомга, 9 декабрь 2016, Казан вакыты 07:10

Mäğlümat agentlıqları xäbär itüençä Ğiraqta Amerikan ğaskärläre 13 keşene atıp ütergän


Uzğan töndä Amerikan ğaskärläre Bağdadtan könbatışqa taba urnaşqan Falluca şähärendä ut açıp 7 Ğiraq keşesen atıp ütergän. Bu xaqta polkovnik Arnold Bray belderde. Mäğlümat agentlıqları, kimendä 13 keşe häläk bulğan dip xäbär itte. 45 Ğiraqlı yaralanğan. Amerikan köçläreneñ xärbi idaräse , Ğiraqlılar berençe bulıp ut açtı dip belderde. Şahitlär isä, Amerikan xärbiläre berençe bulıp attı dip belderä. Amerikan ğaskärläre xäbär itüençä Ğiraqta elekke neft ministrı Ämer Räşid Mohammäd al-Ubaydi qulğa alınğan. Kiçä ministr üz teläge belän birelgän. Säddäm xökümätendäge 55 wäkilneñ 47se-qulğa alınğan inde. Räşidneñ xatını “mikrob doktorı” iseme belän tanılğan mikrobiologiä belgeçe Rihab Taha, Ğiraqnıñ yäşren biologik qoralı öçen cawaplı bulğan dip farazlana. Anıñ qayda bulğanı mäğlüm tügel. Bügen Bağdadta Amerikan häm Ğiraq neft sänäğäte räsmiläre oçraştı. Ğiraqtağı waqıtlı xakimiätne citäklägän amerikan wäkile Jay Garner qatnaşında uzğan bu oçraşuda sänäğätneñ bu tarmağın tözekländerü turında süz barğan. Neft böten ilne ayaqqa bastıruda da möhim rol uynayaçaq. Ğiraqta Söğed Ğaräspatnnan qala dönyada ikençe iñ zur neft zapasları bar.

XS
SM
MD
LG