Accessibility links

Кайнар хәбәр

Putin-Blair sөylәşülәre nәticәsez tәmamlandı.


Britaniә premier ministere Tony Blair, Russiәneŋ Ğıraq konfliktına qarata pozitsiәsen yomışartu mөmkin bulır digәn өmet belәn Mәskәvdә bulıp kitte. Lәkin, Russiә prezidentı Putinnәn açıq hәm qәtği cavap aldı. Putin ğadi itep әytkәndә," bez sezneŋ belәn tügel hәm sezgә ışanmıybız" digәn fiker belderde.

Britaniә premiere Blairneŋ Ğıraq suğışı sәbәple xasıyl bulğan diplomatik yaralarnı dәvalau maqsәte belәn Mәskәvgә yasağan vizitı nәticәsez tәmamlandı. Ul ğına da tügel, Russiә prezidentı Putin BMOsı sanksiәlәren küçtәn çığarunı kire qağqannan hәm Ğıraqta massa külәm yuq itü qorallarınıŋ bulmauı da ixtimal dip beldergәnnәn soŋ, buş qul belәn qaytıp kitte dip әytergә bula. Putin monıŋ belәn genә çiklәnmәde, ul BMOsı qoral inspektorları Ğıraqqa qaytırğa tieş dip talәp itte hәm Blairnıŋ yaŋa strategik partnerlıq turndağı qaraşın, AQŞnıŋ xalıqara mәnәsәbәtlәrdә өstenlek itüe qabul itelmәslek dip kire qaqtı. Bu fiker ayırmalıqları sөylәşülәrdәn soŋ ütkәrelgәn press-konferensiәdә açıqlandı. Premier Blair AQŞ belәn Britaniә, BMOnıŋ Ğıraqta mөhim rol uynarğa tieşlegen qabul itә, lәkin, tulı kontrolne birergә ciınmıylar dip belderde. Ul Iminlek Şurası ağzaları Ğıraqta bezneŋ soldatlarıbıznıŋ suğışqanın hәm ülgәnen hәm Ğıraq өstennәn kontrolneŋ BMOna tapışırılmayaçağın qabul itәrgә tieşlәr dide. Britan premiere xalıqara cәmağәtçelek Ğıraq suğışı sәbәple xasıyl bulğan ayırmalıqlarnı beterә almağan xәldә bu zur qurqınıç tudıraçaq dip tә kisәtte. Lәkin, Putin üzeneŋ pozitsiәsen yomışartmadı. Ul Ğıraqqa sansksiәlәr, anda massa külәm yuq itü qoralları bar digәn sәbәp belәn quyıldı. Şul sәbәple sanksiәlәr, Iminlek Şurası andıy qorallar yuq digәn nәticәgә kilgәn xәldә genә kөçtәn çığarıla ala. Monıŋ өçen isә BMOSı inspektorlarınıŋ urında tikşerülәr ütkәrülәre zarur dip belderde. Putin quyğan soraular da Blairgә ber dә oşamağandır, çөnki ul Britaniә hәm AQŞqa ışanıç mәsәlәsenә qarıy.

Audio

Putinneŋ bu sorauları diplomatik teldә bez sezgә ışanmıybız digәn mәğnәgә qaytıp qala. Putin ikençe mәrtәbә Blairne cәmağәtçelek aldında qıyın xәldә qaldırdı. Uzğan yılnıŋ Üktәber ayında Putinneŋ Mәskәv yaqınındağı daçasında bulğan oçraşu vaqıtında da Putin, Britan xөkümәteneŋ Ğıraqnıŋ massa külәm yuq itü qoralları turındağı raportın propoganda dip bәyәlәgәn ide. Blair-Putin oçraşuınıŋ nәticәsez tәmamlanuı, küzәtәçelәrneŋ ni өçen bu oçraşu kirәk buldı soŋ digәn sorau quyularına sәbәp buldı. Oçraşu taraflarnıŋ pozitsiәsen yaqınlaştıruğa kitermәde, Kiresençә, pozitsiәlәr arasındağı ayırmanıŋ zur buluın ğına kürsәtte.

Fәrit Idelle, Praga.
XS
SM
MD
LG