Accessibility links

шимбә, 10 декабрь 2016, Казан вакыты 16:00

Yaqın könçığış öçen yaña tınıçlıq inisiativası turında


Fälästinnärneñ premier Mäxmud Abbas citäkçelegendäge yaña xökümäte raslanğannan soñ ,AQŞ, Yevropa Berlege BMOsı häm Russiä tarafınnan äzerlängän ‘solıx yulı ‘ dip atalğan Yaqın Könçığış öçen tınıçlıq planı İzrael premiere Şaronğa häm Abbasqa tapşırıldı.55 yıllıq İzrael-Ğäräb konfliktın xäl qılıp bäysez Fälästin däwläten oyıştırunı mäqsat itep quyğan plannıñ ğämälgä aşuı öçen taraflarnıñ şulayuq Waşington häm berektäşläreneñ aldında bixisap biyek kirtälär tora.

Fälästinnärneñ berençe premier ministırı Abbas İzraelgä qarşı qorallı suğış alıp baru, fälästin mäsäläse öçen häläkät dip äytkän,urta yulda toruçı säyäsätçe . Waşington yaña premier İzrael belän tınıçlıq söyläşüläre alıp barır dip ışana. Prezident Bush çärşämbedä solıx öçen här ike yaq ta adımnar atlarğa tieş, ämma Abbasnıñ kilüe eşlärne qulaylaştırır dip äytep (audio) Min optimist. Min Fälästin xakimiätendä terrorğa qarğı köräşü zarur dip äytüçe keşe buluına ışanam , bu tınıçlıq protsesında alğa taba baru öçen yaxşı mömkinçelek bulıp tora . Häm min bu mömkinlekne qullanaçaqmım. Abbas aldında İzrael tügel ä fälästinnär berençe kirtä bulıp tora. Ul qoralsızlanunı kire qaqqan fälästin törkemnären , watandaşlar suğışı buldırmıy ğına taratırğa, çittä qalunı ber niçek tä qabul itmägän Arafat belän eşlärgä tieş. Terror törkemnäre Abbasnı närsä kötkäneñ şunduq kürsätte. Ul sişämbedä parlamentta terrornıñ barlıq formaların xökem itep çığış yasadı ,anıñ kabinetı raslanıp berniçä säğät tä ütmi Tel Avivde oyıştırılğan intixar höcümendä 3 keşe häläk buldı, distälärçäse yaralandı. Cawaplılqnı Al Aqsa şäxitläre brigadası häm Xämäs üz östenä aldı. Küp kenä analitiklar Arafat Abbasqa iminlek eşlärendä kirtä quyaçaq dip qarıy. Ägär dä ul qorallı törkemnärne tarata başlasa, Arafat häm başqaları Abbasnı fälästin mäsäläsenä qarşı eşläwçe keşe dip tasvirlayaçaqlar . Mäxmud Abbas küptän tügel ber ğäräb gazetasına birgän ängämäde terror näticäsendä bez xalıqara cämäğätçelekneñ yaqlauın yuğalttıq , İzrael xärbiläreneñ üç alu aksieläre ilne, ekonomikanı yuqqa çığardı, intifadanıñ xärbi tös aluı , Premier Şaronnıñ tozagı ide , fälästinnär moña töşte İzrael böten ğäräb illären cimeräçäk xärbi köçkä iä , Şaron suğış teli häm bez aqıl qullanası urınğa näk ul telägänçe eşlädek, suğıştıq. Döres , aqıllı süzlär . Anıñ äytkännären Waşingtonda yaqın könçığış institutında eşläwçe David Makovsky sitat itep kiterde ( audio) Abbas süzlärençä, çit illärdän kilgän investitsiälär kire kitte.. Birelgän fondlar belän bez bu dönyada närsäder tözedek. Bezneñ uramlarıbız, Otel , binalarıbız mäktäp universitetlarıbz bar ide. Küp kenä fondlar birelmi başladı, ni öçen ? Bu tragedie, bez üzebezdän sorarğa tieşebez ni öçen ? Qayber fälsätin oyışmaları fälästin xakimiäten telämi , alar anı cimerep, urının alırğa teli. Ni öçen Fatax intifadağa qatnaştı , bez bu ilne suğış başlar öçenme tözedek. ? Bilgele bulğança, Xämäs, Cihad, Xızbulla yaña xökümätneñ qoralsızlanu taläplärenä şulayuq, solıx yulı planına qarşı çığacaqbız dip äytep quydı. Xämäsneñ säyäsi qanatı citäkçese al Rantissi (audio) bez keşelärebzne qoralsızlandırmayaçaqbız, Fälästin xakimiäteneñ bezneñ oyışmalarnıñ bersen dä qoralsızlandıruına röxsät itmiäçäkbez, yaña xökümät fälästin xalqına yardämme itäçäk ällä xalıq aña qarşımı bulaçaq digän mäsälädä här kemne ışandıru öçen üzebezne saqlarğa tieşbez. Yaqın könçığış säyäsätendä AQŞnıñ mäxsus ilçese bulıp yöregän Dennis Ross Ğäräb däwlätläre Abbasnıñ eşen qulaylaştıru, eşlägän eşeneñ legitim buluın raslağan urtaq deklaratsiä iğlan itä ala dide. Çärşämbedä izrael häm fälästinnärgä tapşırılğan solıx yulı isemle plan 3 fazadan tora häm här ike yaqnıñ çaralar kürüen taläp itä. Fälästinnärneñ köç qullanuın tuqtatuğa cawap itepİzrael çiklärne açu, yähud utarların cimerü kebek taşlamalar yasıy berençe fazada, ikençe fazada waqıtlı Fälästin däwläte oyıştırıla, häm öçençe fazada Yerusalem, fälästin mohacirläre , çiklär kebek qatmarlı eşlär tikşerelä. Bu plannıñ zäğif yaqları bar, berençeden ul taraflarnıñ söyläşüe näticäsendä äzerlängän tügel, ä başqalarınıñ äzerläp şulay eşlärgä tieşsez digän plan, Küp kenä keçkenä detallär säbäple eleke söyläşülär körçekkä terälde, köç qullanıluı tuqtalsa da, Yerusalem, çiklär , mohacirlar dip kenä äytelgän bu süzlärneñ här berseneñ artında ike yaqnıñ da aşa almağan, yäki taşlamalarğa barmağan zur problemalar yata. Ämma Arafatnı çitkä qağıp premier postına Maxmud Abbasnıñ kilüe , Fälästin törkemnären yaqlauçı Saddamnıñ çitlätelüe , terrorğa qarşı başlatılğan suğış häm ekstremizmğa qarşı aksiälär nindider ömed çatqıları xasıyl itä . Şulayuq qorallı fälestin törkemnäreñ yaqlauçı Sürieägä qarata AQŞnıñ ğına tügel ä Yaponie , Fransiäneñ dä bu könnärdä basımnı arttıruları bälkim dä ‘ solıx yulı ‘öçen şans bulaçaq

Färidä Xämit, Praga
XS
SM
MD
LG