Accessibility links

...kommunistlar ayırım miting uzdırdı


Şuşı tamaşanı Tatarstan kommunistları, ЛДПР häm alarnıñ teläktäşläre çittän genä küzätep tordılar. Qullarına totqan şığarläre arasında hönärilär berlege häm “Единая Россия“ şiğarlärenä awazdaş, xökümät dairälären tänqitlägännäre bulsa da, kübesendä alarnıñ üzlären cähännämgä olaqtırırğa teläktäşlek beldergännäre şaqtıy ide. Kommunistlar mitingı başlanu belän Rusiä Däwlät Duması deputatı kommunistlar liderı Aleksandr Saliy elegräk ütkän mitingnı oyıştıruçılarnı faş itte:

Audio (Saliy fikerençä, hönärilär berlege häm “Единая Россия“ citäkçelege ildäge cimereklelek, xäyerçelekneñ töp säbäplären äytmilär. Elekkege Sovetlar Soyuzınıñ böten baylığın berniçä distä oligarxqa üzläşterergä yul açqan yalğan demokratlar ğäyeple ikän. Ä inde hönärilär berlege häm oyışqanda uq xakimiät firqäse bulıp oyışqan “Единая Россия“ üzläre ük xezmät itkän xökümätne tänqitlägän bulıp, xalıqnı tağın ber qat aldarğa tırışalar.)

Bıyılğı demonstratsiä sovet traditsiälärendä başlanıp kitte. Anda keşelär kütärgän şiğarlärneñ dä zatlı, qimmätle ikäne, alarnı bizäwgä aqça jällämägännäre sizelä ide. Demonstratsiädä qatnaşuçı här oratornıñ süzenä nigilistik, yäğni kölep replika äytep torğan küpsanlı yäşlärneñ älege çarağa bolay ğına, buşqa ğına çıqmağannarı sizelep tora ide. Naftalinlı flagların kütärep çıqqan kommunistlar beraz çitläşsä dä, şul uq sovet traditsiälären qüätläp yörüçelär bit. Ğöref-ğadätlärne däwam itü mäslixät närsä, xökümätne, xakimiätne tänqitläwdä dä xaqlıq bar. Pensionerlarnıñ, büdjetçılarnıñ, awıl xucalığında eşläwçelärneñ fäqirlege küz aldında. Rusiä xalqınıñ tormış däräcäse tübänäyüeneñ näticäse qapçıqta yatqan bez kebek yalt itep kürende.

Küptän tügel Rusiä Däwlät statistika komitetı 2002 yılnı ütkärelgän xalıq sanı alunıñ berençe näticälären iğlan itte. 1989 yılğı xalıq sanın alu belän çağıştırğanda, Rusiädäge xalıq sanı 1 840 000 kimegän. Tatarstanda da 2001 yıl belän çağıştırğanda, keşe sanı 6 meñgä kimegän. Şulay itep, nindi genä ictimaği xäräkät, yä säyäsi firqä bulmasın, ul ber ük xalıqnıñ ber ük problemaların qayğırta. Maqsatlar da ber. Aldağı saylawlarda üz yağına mömkin qädär tawışlar cıyu häm şul xakimiät digän tür başına menep utıru. Tik maqsatqa ireşü öçen birelgän şartlar, fora ğına törle.

Yunıs Ätnäle, Qazan
XS
SM
MD
LG