Hindstan häm Paqstan bügen ike yıl däwam itkän qarşılıqlardan soñ berençe tapqır oçraşu uzdıraçaqların xäbär itte. Hindstan premyer-ministrı Atal Behari Vajpayee parlamentta çığış yasap, söyläşülär-mönäsäbätlärne caylaw öçen xäl itkeç çara bulaçaq, dip belderde. Mäğlüm bulğança Dähli häm İslamabad arasında kierenkelek 2001nçe yılnıñ dekabr ayında Hindstan parlamentına bulğan höcümnän soñ tudı. Dähli-suğışçılarnıñ Paqstannan buluın däğwa itte.
Vajpayee, Hinstan Paqstan belän diplomatik bäyläneşlärne yañartırğa häm ike il arasında hawa yulın buldırırğa niätli, dide: “Hawa yulın yañartır öçen ike yaqnıñ da kileşüe näticäsendä Paqstanğa Yuğarı Komissionernı bilgeläw turında qarar qabul itelde. Şulay uq säwdä häm iqtisadi xezmättäşlek ölkäsendä dä alğa kiteş barlığına basım yasıysım kilä, dide Vajpayee.
İslamabadta da Paqstannıñ Mäğlümat ministrı Şeix Räşid Ahmed, ike yaqlı söyläşülärneñ tiz arada başlanaçağın rasladı, tışqı eşlär ministrı Xurşeed Kasuri, Paqstan söyläşülärgä äzer, dip belderde. 11 keşelek Paqstan xökümäte wäkilçelege 8 may könne Dähligä bara.
Amerikan Däwlät Sekretare Colin Powell Hindstan belän Paqstan arasındağı bu tärräqiätne “bik tä ömetle” dip atadı. Britaniä tışqı eşlär ministrı Jack Straw da bu yaña xäbärne xupladı.
