Accessibility links

шимбә, 3 декабрь 2016, Казан вакыты 20:53

"TatMedia" agentlığı tözelä


1 mayda Tatarstan prezidentı Mintimer Şäymievneñ “Tatmedia” agentlığın tözü turındağı färmanı näşer itelde. Bu dokumenttan kürengänçä, agentlıqnıñ töp burıçları itep respublikada mäğlümat mäydanı infrastrukturasın üsterü häm kamilläşterüdä qatnaşu, mäğlümat çaraları eşçänlegendä Tatarstannıñ däwlät säyäsäten formalaştıru häm ğämälgä aşıru, alarğa yärdäm kürsätü bilgelänä. “Tatmedia” şulay uq mäğlümat çaraları häm räsmi xakimiät dairäläre belän xezmättäşlekne üz östenä alaçaq, jurnalistlarnı äzerläwdä qatnaşaçaq.

Yaña agentlıqnı oyıştıru, finanslaw mäsäläläre Tatarstan xökümätenä yöklängän. Äytergä kiräk, älege färmannıñ päyda buluın beräwlär kötep alğan bulsa, ber-işe dairälär, şul isäptän räsmiläre dä, sağayıp qabul itkän, dilär. Matbuğat, televidenie, radio belän citäkçelek itü şaqtıy qatlawlı wä çeterekle mäsälä. Citmäsä, çorı başqa, mäğlümat çaralarınıñ däwlät qaramağında bulmağannarı arta bara. Uñışlı eşläp kilgän bäysez gazetağa, mäsälän, ukazda kürsätelgän qayber problemalar bötenläy qağılmıy, disäñ dä yarıy. Kiresençä, andıy basma räsmi xakimiätneñ iğtibarın köçäytüendä süz ireklegen çikläwne kürä. Läkin oçın-oçqa yalğap yäşägän matbuğat agentlıqnıñ oyışuın şatlanıp qabul itär sıman. Tağın şunısın da äytik, berniçä yıl elek, Mäğlümat ministrlığı yabılğaç, pressa, radio, televidenie belän kem citäkçelek itüe bik sizelmäde. Ber-işe xäbärlärgä qarağanda, bu yünäleştäge federal' ministrlıq ta büdjet aqçaların Mäskäwdän Qazanğa küçermi başlağan. Çönki mäğlümat çaralarınıñ mäşäqätlären öleşçä üz östenä alğan Tatarstan elemtä ministrlığına Lesin citäklägän ministrlıq aqça cibärüne, küräseñ, urınsız dip sanağandır. Qısqası, yaña agentlıq eşne qay yaqqa borır - monısın ozaq kötärgä qalmadı.

XS
SM
MD
LG