Accessibility links

дүшәмбе, 5 декабрь 2016, Казан вакыты 21:47

Ğiraqnıñ waqıtlı xökümäte ay urtalarına qadär tözelep betäçäk


Ğiraqnıñ waqıtlı xökümäte ay urtalarına qadär tözelep betergä tieş. Waqıtlı xakimiät başlığı amerikan wäkile Jay Garner, xökümätneñ yädräse-9 Ğiraq keşesennän toraçaq, dip belderde. İdaräçelär törkemendä ike iñ zur Körd partiäläre yulbaşçıları, Ğiraq Milli Kongressı citäkçese Ahmad Chalabi, şulay uq Ğiraqnıñ Şiği, Xristian häm Sunni cämäğätçelege wäkilläre dä bulaçaq. Bügen Mosul şähärendä köndäş etnik törkemnär şähär şurasın sayladı. Mosulnıñ baş xakime aldında şuranıñ 24 äğzase ant kiterde. Qayber namzätlär büleneşneñ etnik törkemnärgä qarap yasaluına qarşılıq belderep saylawlardan üz isemnären alğan dip xäbär itelä. Mosulda xalqınıñ küpçelege-ğaräplär, zur ğına Körd azçılığı, monnan tış törkmännär häm süriälelär yäşi. Berläşkän Millätlär Oyışmasınıñ Xalıqara Atom Energiäse Agentlığı, Ğiraqta atom töş şirkätlärdä bulğan talaw häm urlawlarnı tikşerüne sorap Amerika Quşma Ştatlarğa möräcäğät itte. Agentlıqnıñ matbuğat wäkile Melissa Gleming, Quşma Ştatları, atom qorılmalarınıñ saqlanuı turında xäbär itkän bulsa da, anda talaw häm urlawlar däwam itä, dip belderde. Britaniä ğaskärläre Ğiraqta kimendä közgä qadär qalaçaq. Bu xatqa waqıtlı xakimiät başlığı Jay Garnernıñ urınbasarı general-mayor Tim Cross xäbär itte. Ğiraqta äle aldağı 6 ay eçendä dä zur alğa kiteş bulmayaçaq. Britaniä ğaskärläre ildä humanitar yardäm kürsätergä qala. Yäkşämbe könne Bağdadta Säddäm rejimı keşeläre isemlegendä 53nçe urında torğan qoral belgeçe, ğalimä Hunda Salih Mahdi Ammaş qulğa alınğan. Anıñ Ğiraqnıñ küpläp üterü häm biologik qoralı turında mäğlümate buluı farazlana. Ammaş şulay uq Baath Partiäseneñ cirle idarä äğzase dä bulğan dip xäbär itelä.

XS
SM
MD
LG