Accessibility links

якшәмбе, 4 декабрь 2016, Казан вакыты 06:59

Tatarstanda bäyrämnän soñğı tormış


1 May köne yüweşräk häm salqınraq bulsa da, Tatarstanda bu bäyräm matur ğına ütte. Härxäldä, cämäğätçelekneñ reaksiäse uñay. Qayber töbäklärdä 1 May - 17 yäki 18 may belän ber ük däräcädä ütsä, Tatarstanda bu yulı säyäsi töymälärgä ostaraq bastılar. “Berdäm Rusiä” digän öskä ürmäläwçe firqä eşçelärne, xökümätne tirgi torğan demonstratsiägä üze alıp çıqtı. Bayraqlar, cırlanğan cırlar profsoyuz turında bulsa da, dilbegä Ayular qulında, yäğni “Berdäm Rusiä” qaramağında digän tä'sir qaldı. Kommunistlar isä xakimiät firqäsen dä, profsoyuzlarnı da ber ük zähär süzlär belän büläkläde. Alarnıñ tarafdarları xätsez genä kürensä dä, bu 1 Maynı xakimiät firqäse üz bäyrämenä äyländerde. Bäyrämnän soñğı könnär ğädättägeçä ütte. Eşkä çıqmaw, yal itü, baqçada qazınu. Barı tik awıl keşeläre genä tuqtamadı. Premyer-ministr Röstäm Miñnexanov, prezident Mintimer Şäymiev kebek ük, basularda tufraq uıp, texnikanıñ eşläwen tikşerde. Ul ber çığuda 12 rayonnı urap qayttı.

Bäyräm könnärendä barası da imin qaldı, dip bulmıy. Kukmara rayonınıñ Kenäbäş awılında yanğın çığıp, berniçä keşe zıyan kürde, 12 yäşlek Miläwşä Kayumova häm 32 yäşlek İlnar Zahidullin wafat buldı. Yañğınnın säbäbe – gaz plitäsen qabızğan waqıtta ber qunaq yalğış şırpı sızıp, ballon şartlağan. Saqsızlıq arqasında kilep çıqqan bu qaza käyeflärne qormıy qalmadı.

Rusiä çempionı bulırğa cıyınğan “Uniks” basketbol komandası düşämbe könne Permdä “Ural-Greyt”qa ottırıp, altın medal' öçen köräştän töşep qaldı. Ul iñ küp digändä, bronza öçen köräş alıp barırğa tieş bula. Şulay itep, bıyıl Qazannıñ xokkeyçıları da, basketbolçıları da zur dan yaulıy almadı.

XS
SM
MD
LG