Accessibility links

шимбә, 10 декабрь 2016, Казан вакыты 14:02

“Tatmedia” agentlığınıñ maqsatları häm funksiäläre


Ministrlar Kabinetınıñ atnalıq brifingına öç tema çığarıldı. “Tatmedia” agentlığı, xalıq sawlığın yaqlaw häm 2002 yıl xalıq sanın alu yomğaqları. Älbättä iñ möhime, iñ qızıqlısı - “Tatmedia” agentlığı turında. Agentlıq turında süz küptän yöri. Monnan ike yıl elek, mäğlümat häm matbuğat ministrlığın betergännän soñ, disäñ dä bula. Ministrlıq beterelep, anıñ qayber funksiäläre Elemtä ministrlığına tapşırılğaç, wazifalarınnan buşatılğan yözlägän çinovniklar ğına eşsez-aşsız qalmadı şul. Küp kenä gäzit-jurnallar, bigräktä däwlät qulınnan tamaq tuydıruçılar, yäğni dotatsiälärgä yäşäwçelär häm şundıy gäzit-jurnallarda eşläwçe jurnalistlar yätim qalğanday buldılar. Läkin, yañadan, nindider xökümät strukturası tözü xäzerge zamanda awırğa turı kilä. Mäskäw xakimiät vertikalen nığıta. Töbäklärdä nindider möstäqil qararlar çığarunı, xäräkät qılularnı nıq küzätep tora. Tatarstanda mass-media agentlığı tözü xäl itelgän, menä-menä färman çığaçaq ikän, digän xäbär taralğaç ta, monnan ber-ike ay elek, Rusiä mäğlümat häm matbuğat ministrı urınbasarı, Qazanda ütkärgän ber matbuğat oçraşuında: «Bernindi agentlıq turında süz dä bulırğa mömkin tügel»,- digän ide. Çönki Rusiädä mäğlümat çaraları turında yañartılğan zakon proyektı äzerlängän häm anda töbäklärdä nindider idärä strukturaları buldıru qaralmağan ikän. Häm menä Tatarstanda “Tatmedia” bernindi dä farazlarğa qaramıy oyıştı.

“Tatmedia” oyışu turında färman çıqqannan soñ, älege temağa brifingta täwge kommentariy birelde. Şuña kürä, sişämbe brifingına jurnalistlar bik küp kilgän ide. Alarğa färman asılın häm serlären vitse-premyer Zilä Wälieva söyläp birde. Başta ul “Tatmedia” oyıştırunıñ maqsatların söyläp birde. Mäğlüm ki, “Tatmedia” turında färman çıqqannan soñ “Azatlıq” radiosı bu waqiğağa berniqädär kommentariy yasadı inde. Şuña kürä moña täfsille tuqtalmıyça, barı tik vitse-premyernıñ berençe itep “Tatmedia” ictimaği, däwlät, sotsial' funksiälär başqaru maqsatında oyıştırıluı turında äytüen ireşteräm. Cıyılğan jurnalistlar, şuşı funksiälärneñ cisemenä töşenü öçen, utızlap soraw birdelär. Älbättä, älege üzgärtep qoru turıdan-turı jurnalistlar yazmışına qağıla. Şuña kürä iñ berençe soraw da qaysı gäzitlär qısqartıla, yäğni kemnär-kemnär yuq digän eçtälektä buldı.

Şulay itep, “Tatmedia”nıñ töp funksiäse - ul däwlät aqçaların, ğomumän finanslarnı mäğlümat çaralarınıñ qulına citkerü. Häm monda finanslar töp gäzit-jurnallarğa ğına tügel, ä töbäklärdäge, xätta Tatarstannan çittäge töbäklärdägelärenä dä ireştereläçäk. Kemgä nindi matdi yärdäm birü tenderlar ütkärü yulı häm abunäçelär sanınnan çığıp bilgelänä. Läkin ber iskärmä. Munitsipal', yäğni “Şähri Qazan”, “Казанские ведомости” kebek gazetalar, elekkeçä şähär byudjetında qalalar. “Tatmedia” xökümät strukturasına kerä. Anda utızğa yaqın däwlät xezmätkäre eşliäçäk. Ä menä iñ qızıqlı sorawğa - kem xuca bula digän sorawğa, brifingta açıqlıq yasalmadı. “Tatmedia” xucası bilgelänü turında räsmi xäbär 9 may bäyrämnärennän soñ ğına mäğlüm bulır. “Tatmedia” agentlığı oyıştıru mäs’äläse belän ayıruça qızıqsınuçı «Вечерняя Казань», sişämbe sanında, xuca itep Tübän Kama administratsiäse başlığı urınbasarı Marat Muratov bilgelänäçäk, dip yazıp çıqtı inde. Şundıy uq faraznı Tatarstannıñ räsmi internet säxifäsendä dä uqırğa mömkin. Ul-bu bulsa dip «Azatlıq» radiosı tıñlawçılarına «Tatmediä» citäkçelegenä nämzät turında östämä mäğlümät: Marat Muratovqa 38 yäş, ul jurnalist, süz iregenä bağışlanğan kandidatlıq dissertatsiä yaqlağan, Tübän Kamada mäğlümlät çaraları öçen cawaplı wazifa başqarğan.

Häm axırda waqiğağa ber ğäyre räsmi kommentariy. Agentlıq oyışu mäs’äläsen bik qızıqsınıp küzätkän häm oyıştırmaw yağın suqalağan ber jurnalist brifingtan soñ, privat äñgämädä: «Ä närsä, naçar tügel. Saylawlar aldınnan yaña aqça qapçığı açıp quyu naçarmeni», - dip quydı.

Ä inde, brifingnıñ xalıq sanın alu yomğaqları öleşenä kilgändä, ul alay uq qızıqtırğıç bulmadı. İñ qızıqlı sorawlarğa - tatarlar küpme dä, keräşennär küpme digännärenä, älegä cawap yuq. Bu mäğlümätlär noyäber ayında ğına ölgerälär äle. Ä xäzergä Federal' üzäktän kilgän ğomumi sannar iğlan itelde. Tatarstanda 3779800 keşe isäpkä alınğan. Şularnıñ 1752200 irlär. Qazan xalqı 1989 yılğı xalıq sanın alu belän çağıştırğanda ike protsentqa artqan.

XS
SM
MD
LG