Accessibility links

сишәмбе, 6 декабрь 2016, Казан вакыты 19:08

7 May – radio köne!


Radio tarixı turındağı fänni xezmätlärdä yazılğança, Peterbur universitetında Aleksandr Popov berençe radio tapşırğıçın 1895 yılnıñ näq 7 Mayında kürsätkän bulğan. Radio könen 7 mayda ütkärü şuşı waqiğağa nigezlänä. Qazanda berençe radio qabul itü stansiäse 1918 yılnıñ 20 martında eşli başlıy. Ä 1921 yılda Qazanda berençe rupor-tawış köçäytkeçe sınaw ütä. Şuşı caylanmanıñ uñışlı eşläwen kürgäç, partiä anı Mäskäw mäydannarına quyarğa, digän qarar qabul itä.

Qazanda häm Tatarstanda şaqtıy radiolar bulsa da, 7 mayda räsmi bäyräm çaraları ütkärelmi. Sul uq waqıtta, 7 may elemtä xezmätkärläre köne dä. 8 mayda Elemtä ministrlığı 10 yıllığına bağışlanğan bäyräm cielışın uzdıra.

Tatarstanda bu könnärdä 31 kommersiä stansiäse häm 45 FM tapşırğıçı eşläp kilä. Xäzerge köndä här şähär, här rayon üzäge üz radioların buldırırğa teli. Mäsälän Saba rayon üzägendä, şuşı yıllarda üz FM radiosı häm soñınnan televideniesı da barlıqqa kilde.

Qazanda 10 yaqın FM-radiostansiä eşläp kilä. Yañaları çıqqan arada, iskeläre yabıla tora. Berençelärdän bulıp, tatar häm urıs telendä söyläwüçe «Qazan» radiosı yabıldı, annan soñ, täwlek buyına tatar cırların yañğıratuçı «Dulqın» radiosınıñ da tapşıruları tuqtadı. FMda berençelärdän bulıp tatarça söyli başlağan «Quray» radiosınıñ da kiläçäge alay uq ışanıçlı tügel. Soñğı waqıtta radionıñ yabılu ixtimallığı turında süzlär yış işetälä. «Quray» urıs telle «BİM» radiosınıñ ber öleşe dip sanala. Şuşı ike radiolarnıñ citäkçese Vyaçeslav Dolgopolov «Tatcenter» internet-agentlığına, «Quray» radiosın yabarğa turı kiler, çönki anı totu öçen tabış aqçaların sarıf itärgä turı kilä, - dip äytkän ide.

«Quray» radiosı älegä qädär yabılmadı, başqa tärtiptä bulsa da, eşläwen däwam itä. Berençe könnärdän birle «Quray»da eşlägän DJ Nur Aliev annan kitkäç, aña teläktäşlek kürsätep, radionıñ başqa alıp baruçıları da eşen taşlap kitkän. «Quray» radiosınıñ elekke direktorı Färit Ğalimullin da, xäzer, başqa eş belän şöğellänä. Xäzer radionıñ köndezge efirın berkem dä alıp barmıy, kiçke säğätlärdä genä berdänber DJ qotlawlarnı häm iğlannarnı uqıy. Qızğanıç, kön däwamında bu radionıñ citäkçelege belän elemtägä kerep, «Quray»nıñ yazmışı turında añlatmalar alıp bulmadı.

Alayda, tatar radioları yabıla bara, dip äytep bulmıy. Monnan 1 yıldan elek açılğan «Tatar radiosı», mäsälän, uñışlı ğına eşläp kilä. Qupşı bäyrämnär uzdıra, konsertlar ütkärä. Läkin ul da, finans yaqtan üz üzen aqlıy, dip äytep bula mikän, çönki bu radionı «Bars-Media» digän zur şirkät tota. «Tatarstan» radiosı häm «Yaña ğasır» radiosı da, tapşırularnıñ yartısın tatar telendä alıp bara. Läkin alarnı kommersiä kanalları belän çağıştırıp bulmıy. Çönki alar finans yärdämne däwlättän ala. Şulay itep, Tatarstanda tatar telendä eşläwçe, reklama isäbenä kön kürüçe, möstäqil radio turında älegä süz yörtep bulmıy.

XS
SM
MD
LG