Amerika Quşma Ştatlar däwlät sekretare urınbasarı Kim Holmes Rusiä tışqı eşlär ministrı İgor İvanov häm Rusiäneñ Ğiraqtağı diplomatik wäkile, ministr urınbasarı Yuri Fedotov belän oçraştı. Bügen Mäskäwgä häm soñınnan Germaniägä bulaçaq säfärneñ maqsatı- Ğiraqqa quyılğan çikläwlärne beterügä yaqlaw ezläw.
Kiçä däwlät sekretare Colin Powell Amerika Quşma Ştatları, Ğiraqqa bilgelängän sanksiälärne beterüne sorağan rezolyutsiä äzerläp İminlek Şurasına täqdim itäçäk dip beldergän ide. Kim Holmes, bügen uzğan söyläşülär belän qanäğät qaluın belderde.
Bügen Rusiä tışqı eşlär ministrı İvanov şulay uq Söğed Ğaräpstan tışqı eşlär ministrı şaxzadä Saud al-Faisal belän oçraştı. Rusiä Ğiraqqa humanitar yardäm kertü çikläwlären beterergä cıyına. İvanov, Ğiraq xalqı küp cafa çikte, dip belderde. Läkin Rusiä-sanksiälärne Berläşkän Millätlär Oyışması aşa beterü yaqlı.
Germaniä Ğiraqqa tınıçlıq saqlaw köçlärenä üz xärbilären cibärergä mömkin. Saqlanu ministrı Peter Struck, ägär Berläşkän Millätlär Oyışması NATOdan yardäm sorasa, Germaniä –qaysı il ğaskärlären qatnaştıru turındağı söyläşülärdä qatnaşırğa riza, dip belderde. Läkin bu xaqta möräcäğät Amerika Quşma Ştatlarınnan tügel, ä Berläşkän millätlär Oyışmasınnan bulırğa tieş.
Ğiraq suğışı tiräsendäge fiker ayırmalıqlarınnan soñ suınğan Berlin-Waşington mönäsäbätlären xäzer ike yaq ta tözätergä tırışa. Amerikan Däwlät Sekretare Colin Powell kiläse atnada Berlinğa bara.
14-15 däwlätneñ xärbi generalları bügen Londonda oçraşıp Ğiraqta tınıçlıq saqlaw ğaskärlären tözü turında fiker alıştı. Britaniä saqlanu ministrlığınıñ matbuğat wäkile-utırışta qatnaşuçılar-qaysı il wäkilläre buluların äle belderergä telämi, dide. Germaniä ilçelege-utırışta Germaniä wäkilläreneñ qatnaşuın kire qaqmadı, läkin raslamadı da.
