Accessibility links

дүшәмбе, 5 декабрь 2016, Казан вакыты 05:31

AQŞ Hindstan belän Paqstan arasındağı nizaqnı çişüdä aradaşçı bularaq qatnaşırğa teläk belderde


Paqstan belän Hindstan arasında tınıçlıq söyläşülären tizlätü maqsatı belän bügen İslamabadta Paqstan citäkçeläre häm Amerika Quşma Ştatları Däwlät Sekretare urınbasarı Richard Armitage oçraştı. Prezident Perwez Möşärräf häm tağın qayber başqa citäkçelär belän söyläşülär uzdırğaç, matbuğat oçraşuında, Armitage, Quşma Ştatlar taraflarğa basım yasarğa cıyınmıy, dip belderde: “Minem xäzerge wazğiättä Hindstanğa barmaq belän törtep kürsätüem yä Paqstannı ğayepläwem döres bulmas. Bügenge wazğiätneñ 50 yıllıq tarixı bar. Bez, Amerika Quşma Ştatları, barı tik aradaşçı bularaq ike yaq belän dä tigez söyläşülär uzdırırğa tırışabız” dide Armitage. Hindstan Paqstannı Kaşmir töbägendäge siğışçılarğa qoral häm aqça cibärep toruda ğayepli. Paqstan isä , üze äytüençä, “azatlıq öçen köräşüçelärgä” ruxi yardäm genä kürsätep toruın qabatlıy. Paqstan –islam suğışçılarınıñ Paqstannan ütep kermäwlären kontrol iter öçen Kaşmir çiklärenä xalıqara küzätüçelärne çaqırunı täqdim itä. Richard Armitage bügen kiçen Äfğanstanğa, şimbä könne isä Hindstanğa bara. Bügen Hindstan premyer-ministrı Atal Behari Vajpayee, Paqstannıñ-ike ildä dä atom töş qoralnı yuq itü täqdimen kire qaqtı. Paqstannıñ qoralı Hindstanğa yünälgän, dide Vajpayee. Hindtsannıñ isä Paqstannan ğına tügel, başqa däwlätlärdän dä saqlanası bar, atom töş qoralnı yuq itü-mömkin tügel, dip belderde Vajpayee.

XS
SM
MD
LG