Accessibility links

шимбә, 3 декабрь 2016, Казан вакыты 20:54

Ciñü bäyräme niçek ütte?


9 May bıyıl Tatarstanda ğädättägedän tantanalıraq ütte. Veterannar sanı kimegän sayın, faşizmnı ciñüdän soñ ütkän waqıtlar yıraqlaşqan sayın Ciñü utları yaqtıraq kürenä. Küräseñ, mondıy ciñü, mondıy bäxetle mizgel sağındıradır. Ni disäñ dä, bez ciñüçe, bez buldırabız digän käyef belän yäşäwe räxäträk. Tatarstan başqalası Qazan Rusiäneñ saqlanu ministrı Sergey İvanov färmanı buyınça tup atıp, feyerverk ütkärüçe şähärlär isemlegenä kermägän. Mäskäw, Tula, Samara, Volgograd kebek xärbi waqiğalarğa bäyle şähärlärdä genä bäyräm salyutı täğäyenlängän ide. Xäyer, küp kenä şähärlär Mäskäwdän kürsätmä kötep tormıy. Suğış waqıtında un meñ xärbi oçqıç yasap cibärgän häm patronnar äzerläwçe Qazan Ciñüneñ qäderen belä. Tatarstannan suğışqa 550 meñ keşe kitep, şunıñ 300 meñnän artığı häläk bulğan. Dimäk, yartısınnan kübe. Nindi xätär tamük utlarına kergän bu yaqtaşlarıbız? Häm alar nindi qaharman bulğan. Här ike keşeneñ berse tögäl, ä öç keşeneñ ikese diärlek suğışta başın salğan.

Bäyräm salyutı, äytkänemçä, Mäskäwdän qalışmağandır. Bıyıl bigräk tä xalıq küpläp yäşi torğan Qazan-su buylarındağı 39 kvartal, Azino mäxällälärendä yäşäwçelär dä küktäge utlı çäçäklärne kürsen öçen salyut tupları yaña urınnarğa quyılğan ide. Ä inde Qazan Kremle häm şundağı küper tiräsendäge tamaşağa böten şähärdän keşelär kildelär.

XS
SM
MD
LG