Ä sişämbe könne “Qazan” milli mädäni üzägendä Mordoviä Respublikası Lämberä rayonınnan kilgän “Umırzaya” tatar xalıq cır häm biyu ansamble üz çığışın täqdim itte. Konsert başlanğançı Bötendönya tatar kongressı Başqarma komitetı räise Rinat Zakirov süz aldı. Häm millättäşlärebezneñ şulay görläp milli çaralar uzdırularına, üz ğöref-ğadätlären saqlap qalularına soqlanu belderde. Ansambl'neñ citäkçese Räşidä İpkäyeva prezident Mintimer Şäymievkä, kongress räisenä bar tatar xalqına üzeneñ olı räxmäten belderde. Konsertta ansambl' tatar xalıq häm estrada cırların başqardı. Şulay uq säxnäläşterelgän “Qaz ömäse”, “Qız yılatu”, “Saban tuyı”, “Aulaq öy”, “Awıl kiçläre” küreneşläre qursätelde. Ämma keşelärneñ konsertta äz buluı ğına küñelne töşerde. Ällä oyıştıru citep betmägän, ällä inde çittäge millättäşlärebezgä ixtiram şul xätle genä.
