Rusiä Yuğarı mäxkämäse möselman xatın-qızlarınıñ pasportqa yawlıq bäyläp töşü xoquqın tanıdı

Xalıqara ğailä könenä iñ zur söyeneç xatın-qızlarğa, bigräk tä Şäriğät quşqança yäşärgä künekkän, yä künegep kilgän möselman xatın-qızlarğa kilde. 15 mayda Rusiä Yuğarı mäxkämäse möselman xatın-qızlarınıñ pasportqa yawlıq bäyläp räsemgä töşü xoquqın tanıdı, dielä “РИА-новости” xäbärendä. Mäğlüm ki, Tatarstannıñ ber törkem möselman xatın-qızları mondıy xoquq öçen köräşne ber yıl çaması elek, Rusiäneñ yaña pasportlarına fotoğa töşkändä baş kiemen salıp töşäse mäğlüm bulğaç başlağannar ide. Başta alar Tatarstan yuğarı mäxkämäsennän “отказ” aldılar. Tatarstan mäxkämäse Rusiä Federatsiäse pasport-viza bülege instruksiäsen rasladı. Yäğni, xatın-qızlar pasportqa räsemgä töşkändä yalan baş bulırğa tieş.

Tatarstan möselman xatın-qızları cämğiäte eşne yıraqqaraq häm zurğa cibärergä niätläde. Çönki xaq möselmannarğa monda çigüne yulı yuq ide. Rusiä prezidentı uzğan cäy Qazanğa kilgäç, forsattan faydalanıp, möräcäğät tapşırıldı. Tatarstan diniä näzaräte problemanı çişüdä Yevropa Şurasınıñ keşe xoquqları komissarına yärdäm sorap möräcäğät itte. Möselman xatın-qızlarınıñ xoquqın Tatarstan xoquq saqlaw oyışmaları, Mäskäw-Helsinki törkeme, “Memorial” kebek abruylı xoquq saqlaw oyışmaları yaqlap çıqtı. 5 martta Rusiä Yuğarı mäxkämäse çirattağı tapqır Tatarstan möselman xatın-qızlarınıñ möräcäğäten kire qaqtı. Häm menä, nihayät, 15 mayda Rusiä eçke eşlär ministrlığı instruksiäseneñ qähär suqqan 14nçe punktı ğämäldän çığarılğan. Xäzer Rusiä möselman xatın-qızlarına yawlıq bäyläp pasportqa räsemgä töşärgä yarıy.