Accessibility links

шимбә, 3 декабрь 2016, Казан вакыты 22:44

Fransiә, Buş administratsiәsen media yardәmendә Fransiәneñ abruyın tөşerü maqsatı belәn kampaniә alıp baruda ğәyeplәde. Washington monı kire qaqtı.


Fransuz xөkümәte AQŞ administratsiәsen Fransiәneñ abruyın tөşerergә tırışuda ğәyeplәde. AQŞ rәsmi şәxeslәre monı kire qaqtılar. Ğıraq suğışı sәbәple ike il arasında salqınayğan mөnәsәbәtlәrne yaqın kilәçәktә yaxşırtu mөmkin bulmas kebek.

Fransiә Buş administratsiәse vәkillәren, Fransiә Saddam Xөsәin xөkümәtenә xәrbi hәm diplomatik yardәm birde digәn disinfromatsiә taratuda ğәyeplәve belәn ğәdәttәntış adım atladı. Buş administartsiәsen mәtbuğatqa yalğan infromatsiә birü yulı belәn Fransiәneñ abruyın tөşerergә tırışudağı ğәyeplәvlәr, Fransiәneñ Washingtondağı ilçese Jean-David Levitteneñ Aq Yortqa, Dәvlәt Departamentına hәm Kongressqa cibәrgәn xatında yazılğan. Annan başqa Fransiәneñ tışqı eşlәr ministerlege AQŞtağı diplomatlarına anti-Fransiә kampaniәse turında mediada işarәlәrneñ bulu-bumauın küzәtü өçen dә kürsәtmә birgәn. Şuşı xatqa ike bittәn torğan isemlek tә berketelgәn. Anda amerikan informatsiә çaralarında Fransiәne Ğıraq rejimı belәn elemtәlәre turında bilgesez çığanaqlarğa tayanıp alğa sөrelgәn ğәyeplәvlәrgә qarağan soñğı 9 ayda basılğan maqәlәlәr sanap ütelgәn. Şuşı maqәlәlәrdә Fransiә belәn Germaniә Ğıraqqa atom qorallarında da qulanıla alğan cihazlar birüdә, Fransiә şirkәtlәre xәrbi oçqıç hәm boraqlarnı өçen zapas kisәklәr birüdә hәm başqa eşçәnlektә ğәyeplәnә. Alarnıñ soñğısı 6-nçe mayda Washington Timesta basılıp çıqtı. Ul maqәlәdә iseme әytelmәgәn ber küzlәv oyışması xezmәtkәrenә tayanıp, Fransiә Siriәgә qaçıq çıqqan Ğıraq rәsmilәrenә Kөnbatış Yevropağa kerә aluları өçen fransuz passportları birüdә ğәyeplәngәn ide. Fransiә bu ğәyeplәvlәrne qәtği rәveştә kire qağıp kilde hәm xәzer Buş administratsiәsen üzenә qarşı yala yaqqan kampaniә alıp baruda ğәyeplәde. Aq Yort monı kire qaqtı. Saqlanu ministere Rumsfeld ta Pentagondağı brifingta bu xaqta quyılğan sorauğa bolay dip cavap birde.

Audio

"Bu binadan andıy kampaniә alıp barılmıy. Xөkümәtneñ başqa ağzaları xaqında ber nәrsә dә әytә almıym , lәkin, bu xaqta işetmәdem."

AQŞnıñ Fransiәneñ Ğıraq suğışına qarşı pozitsiә aluı belәn qәnәğәt bulmauı ser tügel. Şulay uq xөkümәtlәrneñ yaki qayber rәsmi şәxeslәrneñ informatsiә çaraların qullanuları hәm şuşı maqsәt belәn qayber mәğlümәtlәrne ıçqındıruları da yañalıq tügel. Şulay da AQ Yort Fransiәgә yala yağu kampaniәsen alıp baruın kire qaqtı. Aq Yort süzçese Scott McClellan Fransiә belәn mөnәsәbәtlәrneñ naçarlana baruı turındağı raportlarnıñ әhәmiәten kimetergә tırıştı.

Audio

"Bez kilәçәkkә qarıybız. Ütkәndә qayber qıyınlıqlar bar ide hәm bez kilәçәkkә qararğa telibez. Fransiә, dus , berektәş il hәm bezneñ borınğıdan birle mөnәsәbәtlәrebez bar. Küpkenә mәsәlәlәrdә mәnfәğәtlәrebez urtaq hәm bergә eşli alabız. Bez alğa taba barabız."

Fransiәdә 8 aldınğı ilneñ summitı bulaçaq. Şuşı summitta Buş belәn Şiraq arasındağı mөnәsәbәtlәr ike il arasındağı kilәşәktәge bәylәneşlәrneñ dә nindi bulaçağın өleşçә açıqlayaçaq. Monda әlbәttә, Fransiәneñ Ğıraqqa qarağan rezolutsiәgә Iminlek Şurasında nindi reaksiә kürsәtüe dә zur rol uynayaçaq. Qısqası, AQŞ-Fransiә mөnәsәbәtlәre şaqtıy qatmarlı hәm xәtta kisken bulıp qala birә. Alarnı yaqın kilәçәktә sülpәnәytü, normallaştıru qıyın bulaçaq kebek.

Fәrit Idelle, Praga
XS
SM
MD
LG