Accessibility links

дүшәмбе, 5 декабрь 2016, Казан вакыты 13:39

G.Schroeder: Ğiraqqa bilgelängän çikläwlärneñ kiräge qalmadı


Berläşkän Millätlär Oyışmasınıñ İminlek Şurası Ğiraqta sanksiälärne beterü turında Amerika Quşma Ştatları täqdim itkän rezolyutsiä ölgesen bügen qarıy. Rezolyutsiä –Ğiraqnı tözekländerü eşendä Berläşkän Millätlär Oyışmasına wäkälätlär birä, läkin töp eşçänlekne Amerika Quşma Ştatları citäkçelegendäge koalitsiä alıp baraçaq, dielä. Monnan tış resolyutsiä proektında Berläşkän Millätlär Oyışmasınıñ maxsus koordinatorı wazifası, Ğiraq neftennan kilgän aqçanı Üseş Fondına salıp baru, Ğiraq burıçları häm ilne tözekländerü belän bäyle tağın başqa mäs'älälär turında süz bara. Amerika Quşma Ştatları, Britaniä häm İspaniä täqdim itkän älege rezolyutsiä ölgese, sanksiälärne 3 iün könenä qadär tuqtatıp, Ğiraq neften Amerika Quşma Ştatları citäklägän koalitsiä kontrolenä birergä çaqıra.

Germaniä kanclerı Gerhard Schroeder häm Amerikan Däwlät Sekretare Colin Powell, Ğiraqtan çikläwlärne "mömkin qadär qısqa waqıt eçendä" alu kiräklege turında kileşte. Soñğı tärräqiät-sanksiälärneñ kirägen yuqqa çağardı, dide Schroeder. Berlinda säfärdä bulğan Powell, Schroeder'nıñ sanksiälärne beterüne yaqlawın xupladı, İminlek Şurası resolyutsiäne ber atna eçendä qabul iter dip belderde: "Min, bügen monda bulğan xezmättäşlek häm İminlek Şurasınıñ başqa äğzaläre arasında bulğan kebek xezmättäşlek belän, Ğiraqtan çikläwlärne beteräçäk resolyutsiä ber-niçä kön yä atna eçendä qabul iteler dip ışanam. Ul, Ğiraq xalqına turıdan turı yardäm itä başlaw öçen kiräk", dide Powell.

İke citäkçe uzğan aylarda Ğiraq suğışı tiräsendä bulğan qarşılıqlarnı da urtağa salıp açıqça söyläşte, dip xäbär itelä. Oçraşuda şulay uq, Yaqın Könığış nizağı häm xalıqara terrorğa qarşı köräş turında da süz barğan. Powell Germaniä tışqı eşlär ministrı Joschka Fischer belän dä oçraştı.

XS
SM
MD
LG