Accessibility links

якшәмбе, 4 декабрь 2016, Казан вакыты 15:15

Tübän Novgorodta möselmannar cıyını uzdı


Tübän Novgorod Cämiğ mäçeteñneñ 90 yıllığı häm Tübän Novgorod şähäre häm ölkäse möftilätenä 10 yıl tuluğa bağışlanğan çaralar turında «Azatlıq» radiosı xäbär itep tordı. Comğa könne Rusiädä möselman dini belem birü sisteması turında konferensiä däwam itte. Süz niçek itep mädräsälärdä mullalar äzerläw häm dä yäş buınğa islam mädäniäten añlatu turında bardı. Berençe köndä, konferensiä açılğan waqıtta da näq şuşı mäsälä berençe planğa quyılğan ide. Bu eştä yañalıq bar. Xäzer mäktäplärdä möselman cämäğätçelegendä islam mädäniäten uqıtuğa mönäsäbät üzgärä kebek. Rusiä prezidentınıñ İdel buyındağı wäkilçelege, Tübän Novgorod gubernatorı, şähär xakimiäte häm Tübän Novgorod möftiäte bu çarağa dini eşlärne üzgärtü mömkinlege bularaq qarağan. Konferensiä açılışında iñ zur däräcädäge wäkillär häm başqa din citäkçeläre islamnıñ häm başqa dinnärneñ tınıçlıq häm kamillek öçen tırışuı turında äyttelär.

Sergey Kirienko üzeneñ çığışında ike fiker äytte. Berençedän, dinne inqär itü, islamnı naçar itep kürsätü döres tügel. İdel buyında möselman häm pravoslav din ähelläre tatu yäşilär, kiläçäktä dä şulay bulır. Yäğni, bezdä Kavkaz tügel, bezneñ yaq möselmannarın Rusiä doşmannarı itep kürsätergä yaramıy. Kiresençä, alarnı üsterergä, alarğa yärdäm itärgä kiräk. Yäğni, ikençedän, dini belem birü belän möselmannar da citdi şöğellänsen, Rusiä qanunnarı häm mänfäğätlärenä qarşı kilmiçä, belemle mullalar, mödärislär äzerläsennär, dinneñ mädäni, äxlaqi tä'siren qullansınnar. Añlaşıladır, bu möselmannarğa ğına qaramıy, ğomumän dingä häm berençe çirattan Rusiädä häm İdel buyında küpçelek urınnı aluçı pravoslav dinenä dä qarıy. Älege çaralar küptän tügel iğlan itelgän “Russkiy islam” proyektına awazdaş, xätta täñgäl kilep tora. Elegräk Tatarstan säyäsätçeläre 'evroislam', dip dönyanı şaqqatırğan çaqta, iğtibar itmägän qärdäşlärebez islamnı zamançalaştıru häm däwlät belän kileşterü yulların yañadan küz allarına kiterer. Xäzergä bu eşne yamanlarğa yäki küklärgä kütärep maqtarğa aşıqmıyq. Şimbä könne Tübän Novgorodta ütkän çaralarda qatnaşuçılar ölkäneñ tatar rayonnarında bulıp, mäçetlär qaradılar.

XS
SM
MD
LG