Accessibility links

дүшәмбе, 5 декабрь 2016, Казан вакыты 15:45

Vladimir Putin yullaması respublika iqtisadıy üseşe farazların üzgärtäme?


Ministrlar kabinetınıñ çirattağı sişämbe brifingına öç tema kertelde. Tatarstannıñ 2004 yılğa sotsial'-iqtisadıy üseşe farazı, Xalıq Sänäğät Käsepçelege Üzäge häm “Связьинвестнефтехим” aksionerlıq cämğiäte oyıştıru turında. Berençe qaraşqa, ğäyre säyäsi mäs'älälär. Brifingta da berençe temağa söylägändä, tağın ber tapqır iqtisadıy-sotsial' üseşneñ ike kit balığına: neft'neñ barrele 22 dollar çamasına, ä Amerika dollarınıñ 32 rubl'dän artmawına tayanıp torğanın qabatladılar.

Bıyılğı sotsial'-iqtisadıy üseşneñ öç aylıq näticäläre qänäğätlänerlek, bilgelängän protsentlarğa ireşelgän. Tulayım 2003 yıl öçen dä älegä borçılırlıq urın yuq. Ä inde 2004 yıl öçen qayğırtırğa bötenläy dä irtäräk. Brifingnı alıp baruçı iqtisad häm sänäğät ministrı Aleksey Paxomov süzne şunnan başladı da. Äle bu ministrlıqnıñ kiläse yıl öçen faraznı bolay irtä birüe täwge märtäbä ikän. Häm inde mondıy irtä farazlawlarnıñ säbäbenä sorawlar birä başlağaç qına berniqädär açıqlıq kertelde. “Rusiä prezidentınıñ yıllıq yullamasında sänäğät üseşe tempların bermä-ber üsterü taläbe quyıldı, bu nisbättän Tatarstannıñ iqtisadi üseşendä üzgäreşlär bulamı”, dip turıdan bärdelär jurnalistlar. Yuq ikän, respublika iqtisadı büdjetta bilgelängänçä üsäçäk. Läkin xökümät citäkçeläreneñ tel töbennän şunı da añlarğa bula. Ägär dä Rusiä xökümäte, äytkändäy, uyın barışında uyın qağidälären üzgärtä ikän, Tatarstan elekke şartlardan taypılmıy. Äytik, ber törle salımnarnıñ 80% federal' büdjetqa, 20% respublika büdjetına bara ikän, bu şulay qalsın. Äytik, 90:10 dip üzgärtügä bez qarşı. Respublika büdjetınıñ keremnär buyınça üseşeneñ 3% maqsatlı federal' programmadan dip qaralğan ikän, şul 3% üzgärtelmäsen. Şulay itep, bu mäs'älä inde federal' üzäk belän töbäklär arasındağı mönäsäbätlär säyäsätenä qağıla, bulıp çığa.

XS
SM
MD
LG