äl Qaida Suğut Ğäräbstänendä yaqın arada intixar höcümnärenä äzerlänä digän xabärlärdän soñ AQŞ, Britaniä vä Almanya ilçeleklären waqıtlıça yabıp quydı. Düşämbedä Suğut Ğäräbstäneneñ Ciddä şähre hava meydanında ike marokkolı qulğa alına, alarnıñ Sudan başqalası Xartumğa biletları bula. Politsiä marokkolılar oçqıçnı urlap 11-nçe sintäberdäge kebek Ciddä östendä şartlatırğa äzerlänä ide dip ışana. Qulğa alınğan 2 häm politsiä ezlägän öçençe marokkolı Riyadta 12nçe mayda yortlarnı şartlatqan el Qaida törkeme belän bäyläneştä tora dip qarala. Suğut räsmiläre marokkolılardan sorau alğannan soñ, terror höcüme bulaçaqmı tügel ä ul qayçan bulaçaq digän sorau kön qadağında tora dip äytkännär. marokkolılar närsä söylägänder cämäğätçelekkä belderelmäde, läkin şunnan soñ ilçeleklärne yabu turında qarar qabul itelde.Waşingtonda AQŞ däwlät departamentı süzçese Richard Boucher bolay dip äytte( audio)
Suğut Ğäräbstänendä bilgesez urınnarğa terror höcümnäre oyıştırılaçağı turında ışanıçlı mäğlümät bar. Suğutlu räsmilär nıq saqlanmağan , çit keşelär yäşägän otel, toraqlarğa yäğni yomşaq sivil hädäflärgä äl Qaida höcüm iter dip qurqa. AQŞ ilçelegendäge 120 keşelek personal 50gä kimetelde, diplomatlarnıñ ğailläläre şulayuq amerika watandaşları küpläp Suğut Ğäräbstänennnän çığıp kitä. Cidde vä Dahrandağı konsullıq şulayuq ilçelek in kimendä yäkşämbedä qädär yabıq bulaçaq. FBİ häm CİAnıñ 60 tikşerüçese Suğut Ğäräbstänendä Riyad bombalauın tikşerü eşendä suğutlu kollegalarına bulışlıq kürsätä. Bush administratsiäseneñ Watan iminlege ministırı Tom Ridge , AQŞ küzlä idaräläre Äl Qaida dönya külämendä operatsiälär alıp baru çorına kergän dip qarıy, AQŞnıñ da hädäf buluı ixtimal dip söyläde. Ridge Riyad ısulında şartlaular oyıştırılu turında yanadı Sişämbedäge kisätülärdän soñ AQŞta cirle xakimiätlär, politsiä çarlar kürä başladı. Kaliforniada politsiä 12 säğätlek eş grafigına kerde. NYta milli gvardia metro häm küperlärne saqlarğa çaqırıldı. Waşingtonda politsiäneñ mäxsus bülekläre kötelmägän töntü, patrullar oyıştıraçaq. AQŞta terror höcüme qurqınıçın kürsätkän utlı işarälär sarıdan äflüsen tösenä üzgärtelde. terror qurqınıçına kürä utlar zängär, yäşel, sarı, salğılt qızıl häm qızıl bulıp yandırıla. xakimiätlär ğıraq suğışı aldınnan martnıñ 17dä töslär belän kodlanğan terror kisätüen sarıdan salğılt qızılğa kütärgän häm suğış betkäç 16nçe apreldä sarığa töşergän ide. AQŞ çiklär vä transport ministırınıñ yardämçese Asa Hutchinson terror hevefeneñ sarıdan äflüsen tösenä üzgärtelüe turında bolay dip äytte: ( audio)
Bu üzgäreş Suğut Ğäräbstäne häm Marokkodağı sonğı bomba höcümnäre şulayuq AQŞqa qarşı terror törkemnäreneñ mäqsatları turındağı küzläü xisapları nigezendä yasaldı. AQŞta küzläü idaräläre terrorçılar Quşma Ştatlarındağı hädäflärgä höcümnär planlaştıra dip ışanalar.
Watan İminlege ministırı gubernator häm merlärne bigräk tä xalıqnıñ kübläp cıyılğan urınnarda östämä politsiä urnaştırırğa häm başqa iminlek çarları kürergä öndäde. Federal aviatsiä idaräse başqalada xosusi oçqıçlarnıñ , sport stadiumı yäki Waşington xäykäle yaqınınınnan oçunı tıyarğa planlaştıra.
Färidä Xämit, Praga
Färidä Xämit, Praga