Accessibility links

чәршәмбе, 7 декабрь 2016, Казан вакыты 19:31

Qazanda «Azatlıq» radiosı xäbärçeläre kiñäşmäse bara


Qazanda pänceşämbe könne «Azatlıq» radiosınıñ Tatar-başqort redaksiäse xäbärçeläreneñ seminar-kiñäşmäse açıldı. Kiñäşmägä tatarlar küpläp yäşägän töbäklärdä eşläwçe utızlap xäbärçe häm Pragadan älege redaksiä citäkçelege kilde. Kiñäşmäneñ maqsatı - dönyaküläm säyäsi üzgäreşlärgä kürä, eşläw tärtibendäge üzgäreşlärne ireşterü. Töp taläp zamança eşläw ısullarına küçü. İyün başınnan Azatlıq radiosınıñ Tatar-başqort redaksiäse tapşıruları FM radiosında, tögälräge "Bolğar FM" radiosında retranslyatsiälänä başlıyaçaq. Tıñlawçılar awditoriäse kiñäyügä isäp totıp "Azatlıq" radiosınıñ Tatar-başqort redaksyase tözeleşen dä üzgärtä. Berençedän, tulayım programma "on layn" rejimında yäğni real' waqıt rejimında baraçaq. Yäğni tıñlawçılarğa şul säğäte-minutında barğan wäqiğalar da ireştereläçäk. Töbäklärdän kilgän xäbärlärneñ dä operativlığın, citezlegen arttıru çaraları kürelä. Äytik Tatarstan xäbärläre 10 minutlıq blokka tuplana. Bu blokka şul könne respublikada bulğan 3-4 iñ möhim waqiğa yäki çara, yä bulmasa iñ aktual' temalarğa bağışlanğan ber-niçä yazma keräçäk. Yäğni moñarçı törle könnärgä bülenep eşlägän xäbärçelär barısın da här kön häm könneñ barlıq möhim waqiğalärın säğäte-minutında taswirlap, operativ ölgerlek belän eşläw rejimına küçäçäk. Mäğlüm ki,

«Azatlıq» radiosı urtaq tapşırular äzerläwdä häm tapşırularnı retranslyatsiäläwdä däwlät tele-radiokampaniäse belän xezmättäşlektä. "Tatarstan - yaña ğasır" kompaniäse oyışqaç, Däwlät tele-radiokampaniäse mirası belän bergä älege xezmättäşlekneñ qayber funksiäläre dä küçte. Kiñäşmä aldınnan Tatar-başqort redaksiäse citäkçelege "Tatarstan- yaña ğasır" kampaniäse belän älege xezmättäşlekne tağın da üsterü turında söyläşülär alıp bardı. «Tatarstan- yaña ğasır», iyün ayınnan «Azatlıq» radiosı tapşıruların «Bolğar FM» radiosında retranslyatsiäli başlawğa äzerlegen rasladı. Süz uñayınnan «Yaña ğasır» televideniesen, aldan deklaratsiälängänçä, Könbatış Yewropadan Rusiäneñ Yıraq Könçığışına xätle sibelep yäşägän tatarlarğa ireşterü çaraları turında da äytelde. "Tatarstan - yaña ğasır" kampaniäse bu yünäleştä eşli. Xäzer rayonnarda televizion qalançalar quyu eşläre alıp barıla. Läkin eş qalançalarda ğına tügel. Eş xalıqnıñ matdi xälendä. Çönki "Yaña ğasır" kanalı tapşıruların, ägär dä televizorıña 5-6 meñ sumlıq östämä cihaz alırğa xälennän kilsä Möslimdä dä, Çiläbedä dä, Tömändä dä qararğa bula. "Azatlıq" radiosı jurnalistları kiñäşmäsendä Samardağı xäbärçe monı rasladı da. Xäzer ul yaqta şul östämä cihazlarnı alıp tatarça tapşırular qarawçılar küp ikän. Menä şulay tatar möxitendä eşläwçe mäğlümat çaralarınıñ maqsatları da, eşläre dä izge... Tik äytemneñ däwamındağıça - tıñlawçılar ğına bezdän bizde kilep çıqmasın ide. Monıñ öçen xörmätle tıñlawçılarıbız, xäzerge säğätlärdä, minutlarda sezneñ fikerläregez, uylarığız qäderle. Qazan bürosına räxim itep çıltıratığız 36-81-02, räxim itep elektron poçta aşa xat yazığız.

Yunıs Ätnäle. Qazan.

XS
SM
MD
LG