Accessibility links

чәршәмбе, 7 декабрь 2016, Казан вакыты 11:44

“Xalıq partiäse” saylaw aldı agitatsiäsen başladı


Qazanlılar poçta ärcälärennän kiläse Duma saylawlarına bağışlanğan berençe listovkalarnı-möräcäğätlärne aldılar. Barısınnan da uzdırıp, Rusiäneñ Xalıq partiäse bügen ük saylawçılarnıñ aqılın häm yörägen uyatırğa kiräk digän fikergä kilgän, küräseñ. Qayberäwlär, bu firqä isemenä qarağanda fäqät xalıq mänfäğätlären qayğırtırğa tieş bulsa da, anı prezident yaqlı partiälär isäbenä kertälär.

Häm älege möräcäğättä “Vladimir Putin xakimiäte kilgäç kenä Rusiäneñ däwlät mänfäğätlären yaqlıy torğan kurs ğämälgä aşa başladı,” digän süzlär bar. Bu partiäneñ iñ uñışlı tabışı – “Rusiä xalıqlarınıñ xakimiätkä taläpläre cıyılmasın” buldıru. Dokumentnıñ iseme xalıqçan häm demokratik ruxta yañğırıy. Xalıq firkası keşelärdän täqdimnär, taläplär, şikayätlär cıyıp, bu yılnıñ axırına xätle alarnı Rusiä prezidentına, federal' häm töbäk xakimiätlärenä tapşıraçaq.

25 millionlı tiraj belän näşer itelgän möräcäğättä “minem xakimiätkä taläplärem”, “minem xalıq partiäsenä taläplärem” digän baş astında buş urınnar qaldırılğan.

Xalıq firqäse ğadi keşelärne ni däräcädä xörmät itä dä, alar turında qayğırta soñ, digän sorawğa şuşı könnärdä genä Dumada ğomumi xezmät stajlarına qarağan mäs'älä buyınça tawış birü açıq cawap birä. Eş şunda ki, “Яблоко” fraksiäse ğomumi xezmät stajına, balalarnı qaraw, armiädä bulu, uqu waqıtların kertüne yaqlap, anı tawışqa quydıra. Älbättä, xalıq mänfäğätlären yaqlıybız dip, Dumada här fraksiä kükräk suğarğa yarata. Başqaları xaqında söyläp tormıyça, Xalıq partiäseneñ bu millionlağan keşene borçığan mäs'älä buyınça niçek tawış birüen äytmi bulmıy. Oşbu firqägä kergän deputatlarnıñ barı tik 50% ğına “Яблоко”nıñ täqdimen xuplıy. Qalğannarı, älbättä, qarşı tawış birä.

Süz uñayınnan äytergä kiräk: bu täqdimne yaqlawçılar arasında Tatarstannan nibarı 3 deputat – Flera Zıyätdinova, İvan Graçev, Aleksandr Saliy bulğan. Ä qalğannarı tawış birüdä bötenläy qatnaşmağan. Kem äytmeşli, xalıq üzeneñ geroyların belep torırğa tieş.

XS
SM
MD
LG