Accessibility links

якшәмбе, 4 декабрь 2016, Казан вакыты 23:18

AQŞ Yaqın Könçığışqa tınıçlıq planın ğamälgä aşırunı küzätep baru öçen üz belgeçlären cibärä


Amerikan prezidentı George Bush, İsrael häm Fälestin premyer-ministrlarınıñ oçraşuı Yaqın Könçığışta tınıçlıq urnaştıru eşen tizlätü öçen möhim bulır ide dip belderde, häm üzeneñ –oçraşunı niçek oyıştıru mömkinlekläre turında uylanuın äytte. Bu xaqta Amerikan prezidentı Texastağı rançosında, İsrael premyer-ministrı Şaronnıñ "tınıçlıq yulı" planın qabul itüe turındağı belderüennän soñ äytte. İsrael xökümäte plannı irtägä tikşeräçäk.

Waşingtonda Amerikan Däwlät Sekretare Colin Powell, Amerika Quşma Ştatları, tınıçlıq planınıñ ğamälgä aşırıluın kontrol itär öçen Yaqın Könçığışqa ber törkem küzläw häm iminlek räsmilären cibäräçäk, dip belderde. 7-10 keşelek wäkilçelek aldağı könnärdä ük yulğa çığıp Jerusalimda urnaşaçaq. Powell süzlärençä-älege törkemdäge keşelär sanı waqıtı belän arttırılırğa da mömkin.

Fälestin İminlek xezmäte räsmiläre süzlärenä qarağanda bügen 50läp İsrael tankı häm xärbi maşinalarda İsrael köçläre Könbatış Yardağı Tulkarem qaçaqlar lagerenä kerep Hämäs häm İslam Cihad suğışçıların ezlägän. İsrael radiosı-tikşerülär, Tulkaremdağı fälestinnärneñ yaña terror höcüme äzerläwe turında mäğlümat alınğannan soñ başlandı, dip xäbär itte.

XS
SM
MD
LG