Accessibility links

чәршәмбе, 7 декабрь 2016, Казан вакыты 13:47

İspaniäneñ Äfğänstandağı tınıçlıq saqçıların alıp qaytuçı oçqıç hälakätkä oçradı


İspaniäneñ Äfğänstandağı tınıçlıq saqçıların Qırğızstan başqaladı Bişkäktän alıp İspaniäneñ Zaragoza şähärenä yul totuçı bu oçqıç Törkiäneñ Qara diñgez buyındağı Trabzon hawa alanınnan 50 çaqrımlap yıraqlıqta tawğa bärelgän dip xäbär itelä. Yak-42 oçqıçında İspaniäneñ 62 tınıçlıq saqçısı häm 12 oçqıç xezmätkäre bulğan. Madridta İspaniä Saqlanu ministrlığı da 62 xärbineñ hälak buluın raslap oçqıçta 41 soldat häm 21 xärbi hawa köçläre xezmätkäre bar ide dide. El Mundo gazetı xäbär itüençä, tınıçlıq saqçılaraı äle genä Äfğänstanda 4 aylıq xezmätlären tämamlağan bulğan. Moñarçı Äfğänstanda tınıçlıq saqlawçılarnıñ ülü oçraqları bulmağan.

CNN-Turk televideniese xäbär ütençä, Törkiä xärbiläre oçqıçta beräw dä isän qalmağan dip belderä. Xäzer oçqıçnıñ mäğlümätlär tuplap baruçı qara tartamasın tikşerü eşe bara. Ul hälakät säbäplären tögälräk açıqlarğa yardäm itärgä mömkin. Älegä oçqıç quyı toman säpäple bärelgän dip sanala. Törkiäneñ NTV televideniese äytüençä, oçqıç yağulıq alu öçen ike tapqır töşü omtılışı yasasa da oçuçı quyı toman säbäple cirne kürä almawı turında xäbär itkän. Cirgä töşep utıru öçen öçençe omtılış yasağanğa qädär oçqıç radarlardan yuğalğan.

Hälakät urınında eşläwçe törek xärbiläre citäkçese general Aslan Yıldırım mäyetlärneñ kemneke ikänen açıqlaw bik qıyın bulaçaq, alar törle kisäklärgä tarqalğan dip belderde. Oçqıç töşkän urında berniçä distä mäyet tabıldı dip xäbär itelä.Oçqıçta İspaniä xärbiläreneñ şartlatqıçları da bulğan dip sanala. Şahitlär äytüençä, tawğa bärelgännän soñ yalqınğa kümelgän oçqıçta şartlawlar berniçä minut däwam itkän.

DPA oçqıç Ukrainanıñ carter oçışları belän şöğellänüçe Ukraina-Urta diñgez hawa şirkäte dip atalğan xosusıy şirkäteneke dip xäbär itä. Ul yaxşı xäldä bulğan häm moñarçı oçqıçta bernindi problemalar da küzätelmägän.

Naif Aqmal, Praga.
XS
SM
MD
LG