Accessibility links

дүшәмбе, 5 декабрь 2016, Казан вакыты 13:43

Nadir Däwlät: Törkiädän qarağanda Tatarstandağı xällär alay uq naçar kürenmi


Uzğan şimbä könne Qazanda «Azatliq» radiosı xäbärçeläreneñ yıllıq cielışı tämamlandı. Radiobıznıñ zamança taläplärgä buysınıp, eş tärtiben üzgärtergä cienuı turında xäbär itkän idek inde. Tapşırularnıñ forması üzgärsä dä, alarnıñ eçtälege, radionıñ totqan qiblası şul uq qalaçaq. Radio demokratik cämğiätne tözügä bulışlıq itü, tögäl, obyektiv mäğlümat taratu maqsatın quya.

Uqularnıñ soñğı könendä «Azatlıq» radiosı xäbärçeläre aldında milli problemalarnı öyränüçe ğalimnär çığış yasadı, şuşı uqu qısalarında fiker alışu oyıştırıldı. Anda ğalim-etnograf Damir İsxaqov, milli-mädäni avtonomiälär şurasınıñ cawaplı särkätibe Färit Urazaev, İstanbuldan kilgän ğalim-türkolog Nadir Däwlät qatnaştı.

«Azatlıq» radiosı oyıştırğan älege keçkenä forumda tatar-başqort mönäsäbätläre tikşerelde, respublikanıñ statusına häm Rusiäneñ xäzerge milli säyäsätenä qağılışlı mäsälälär kütärelde. Älege çarada yañğırağan fikerlärne sez «Azatlıq» radiosınıñ analitik tapşırularında işetersez, älegä şuşı äytelgän häm bügenge köngä qarağan ber fiker belän tanışa alasız. İstanbulda yäşäwçe ğalim Nadir Däwlät Törkiä tatarlarınıñ Tatarstan problemalarına bulğan qaraşın çağıldırıp birä.

Audio: Eçtän qarağanda xällär bik ömmetsez kürenä, Tatarstannıñ suverenitetı da yuq, Mäskäw dä gel nindider xäylä qora. Çittän qarağanda alay uq tügel. 90nçı yıllardan başlap, Törkiädä Tatarstan belän qızıqsınu nıq arttı. Elek 1-2 tatar ğalime tatar tarixın öyränsä, xäzer inde töreklär bu xaqta fänni xezmätlär yaza. 10 elek elek monı küz aldına da kiterep bulmıy ide. Törkiä Tatarstan belän qızıqsına. Monda konsullıq açıluı da şunıñ açıq misalı. Xäzerge xakimiättäge partiädä dä Rusiädäge dini xällär belän qızıqsına. Rusiä xakimiätläreneñ yawlıq urağan kileş töşkän foto belän pasport alırğa röxsäte Törkiädä zur reaksiä tudıraçaq, çönki anda da bu mäs’älä bar. Bu da bik zur tärräqiät, çönki Törkiädä bu tıyılğan.

Älege forumda qatnaşqan başqa ğalimnär professor Nadir Däwlätneñ yawlıq mäsäläsendä bulğan optimizmı belän kileşmäde. Rusiädä mäxkämä qararları da, qanunnar da urınına citkerelep, ä qaysıber waqıtta bötenläy ütälmi, dip alar pissimistik qaraş belderdelär.

XS
SM
MD
LG