Accessibility links

якшәмбе, 4 декабрь 2016, Казан вакыты 13:18

Tatarstanda eş belän tä’min itü, mäşğüllek probleması kiskenläşä


Soñğı waqıtta respublikada mäşğüllek, yäğni xalıqça äytkändä, eş tabu, eşkä urnaşu, eşsezlek wäzğıäte qatlawlandı. Xökümät, xakimiät dairäläre soñğı waqıtta problemanı qayğırtuların, çişeleş yulların ezläwlären sizderdelär. Xezmät häm mäşğüllek ministrlığı Leninogorskida, Yäşel Üzändä, Çallıda älege problemalarğa bağışlanğan töbäk kiñäşmäläre ütkärde.

Ministrlar Kabinetınıñ sişämbe könge eşlekle kiñäşmäsendä şul çaralarğa yomğaq yasaldı häm tiz arada mäşğüllek, eşsezlek problemalarına bağışlanğan respublika kiñäşmäse ütkärergä qarar itelde. Bu xäbärne mäğlümat çaralarına älege kiñäşmädä qatnaşqan Xezmät häm mäşğüllek ministrı Boris Zaxarov Ministrlar Kabinetınıñ sişämbe brifingında ireşterde. Başta ul jurnalistlarğa qısqaça ğına mäşğüllek sistemasınıñ tözelü tarixın söyläde. Mäğlüm ki, Tatarstanda “Mäşğüllek turında”ğı qanun 1991 yılda uq qabul itelgän. Şunnan birle respublikada bu ölkädä törle programmalar başqarılğan. 2001-2003 yıllarğa tözelgän ğämäldäge programma qanunğa nigezläp raslanğan. Yäğni respublikada eşsezlek häm eş belän tä’min itü belän küptännän häm citdi şöğellänälär. Läkin soñğı waqıtta eşsezlek probleması kiskenläşte. Monıñ säbäpläre turında Boris Zaxarov bolay dide:

Audio

Berençedän sotsial'-iqtısadı üseş tieşle däräcädä barmıy. Yäğni, citeşterü mäydannarın arttırırlıq, yaña eş urınnarı buldırırlıq tügel. Başqa säbäplär şuşı töptän çığalar häm ere şirkätlärneñ, zavod-fabrikalarnıñ xäle belän bäyle. Eşçelär sanın qısqartu, eş belän tä'min itä almaw säbäple mäcbüri administrativ yallarğa cibärü. Menä şundıy säbäplär arqasında Tatarstanda bıyıl dürt ayda, uzğan yıl belän çağıştırğanda, terkälgän eşsezlär sanı 11% artqan häm 1 mayğa 27 meñ keşe täşkil itkän. Terkälmägännäre belän isäplägändä, bu san 100 meñ çaması ikän. Läkin alda äle problema tağın da kiskenläşä. KamAZ, “Tatenergo”, “Tatneft'” kebek ere berläşmälärdä zur qısqartular kötelä. KamAZda 7 meñ keşe, “Tatneft'” berläşmäsendä 10 meñ, yäğni här bişençe eşläwçe keşe qısqartılaçaq. Älbättä, xökümät alda äytelgän qanunnar, programmalardağıça keşelärne aç-yalanğaç qaldırmaw çaraların küräçäk. Äytik, eşsezlärgä ayğa Rusiädäge yäşäw minimumı külämendä 1.746 sum aqçalata yärdäm bireläçäk. Monıñ belän yözär-meñlägän eşsezlär armiäse niçek kön kürer, här xäldä yaqın yıllarda Tatarstanda töp azıq-tölek, ikmäkter, sötter, itter problema bulmayaçaq.

XS
SM
MD
LG