Accessibility links

дүшәмбе, 5 декабрь 2016, Казан вакыты 23:47

İran Quşma Ştatlar ğäyepläwlären kire qağa


İran yäşeren töstä atom qoralı citeşterü häm Äl-Qaidä citäkçelären sıyındıru turındağı ğäyepläwlärne kire qaqtı. Bu ğäyepläwlärne Quşma Ştatlar belderä. Bügen İslam Konferensiäse Oyışması tışqı eşlär ministrları oçraşuında çığış yasap, İran tışqı eşlär ministrı Kamal Xarazi, küpläp üterü qoralı belän bäyle şiklänülär xalıqara xezmättäşlek aşa xäl itelergä tieş, dip äytte. Raslanmağan ğäyepläwlär, köç qullanular xalıqara çaralarnıñ ähämiäten kimetä dide ul.

Xarazinıñ süzçese Xämit Riza Asefi, İrannı Äl-Qaidä citäkçelären sıyındıruda ğäyeplägän Quşma Ştatlarnı ike-yözlelektä ğäyepläde. Asefi süzlärençä, İranda Äl-Qaidä belän bäyle buluda ğäyeplängän berniçä keşe bulğan, läkin alarnıñ ni däräcädä citäkçe ikäne bilgele bulmağan. Üz çiratında Asefi Quşma Ştatlarnı terorçılıqqa qarşı nıqlap köräşmäwdä ğäyepläde. Anıñ süzlärençä, Ğiraqta möcäxetdinnär dip atalğan, İrannıñ opozitsiädäge törkeme däwlät departamentınıñ terorçı oyışmalar isemlegenä kertelügä qaramastan, Quşma Ştatlar bu törkemgä qarşı tieşle çara kürmägän.

XS
SM
MD
LG