Accessibility links

шимбә, 3 декабрь 2016, Казан вакыты 20:38

Däwlät Şurası utırışı kön tärtibendä säyäsi tösmerle mäsälälär...


29 may könne Qazanda Tatarstan Däwlät Şurasınıñ 16nçı plenar sessiäse eşli başladı. Räsmi mäğlümat çaraları älege waqiğa turındağı xäbärlären “sessiä kön tärtibendä 58 mäsälä”, dip şärexläp başlıy. Mäsälälär küplegenä häm çuarlığına qaramastan, sessiä eşe bik tınıç şartlarda bara. İnde qanunnar täñgälläşterü protsessına da künegelgän. Menä bu sessiäneñ kön tärtiben tikşergändä dä, Mäskäw aşığıç räweştä qanunnar täñgälläşterüne taläp itkän, 4 mäsäläne kertergä quşqanı mäğlüm buldı. Deputatlar qızmıyça, sabır ğına monıñ belän dä kileştelär. Kön tärtibenä kertelgän, yäki qayber deputatlar kertergä omtılğan, qayber mäsälälärne säyäsiläşterergä tırışular da uñış qazanmadı. Sessiäne alıp baruçı Däwlät Şurası räise Färit Möxämmätşin “...saylawlar aldınnan qayber mäsälälägä säyäsi tösmer birü omtılışları tabiği läkin... bez federal' qanunnarda üzgäreşlär bulğan sayın, äkrenläp mäsälälärne tikşererbez, äle bezneñ wäqälätlär büleşü turındağı şartnamäne imzalıysı da bar” dip, mondıy tırışularğa yul birmäde. “Mäğärif turında” qanunğa üzgäreşlär kertü turındağı qanun şul säbäptän, yäğni äle federal' üzäktä açıqlıq bulmaw säbäple, kön tärtibennän töşerelde. Häm şunnan sessiä caylı ğına eşläp kitep, berençe tänäfeskä xätle kön tärtibeneñ 14 punktına citte.

“Satudan salım turında” qanunğa üzgäreşlär, östämälär turındağı mäsäläne tikşergändä genä, sessiädä qatnaşuçı Mintimer Şäymiev ber kälimä süz äytte. Bu kön tärtibendäge azmı-küpme säyäsätkä qağılışlı mäsälägä iğtibar yünältü ide. Eş şunda ki, Rusiä Däwlät Duması yaqın arada satudan 5% alına torğan salımnı ğämäldän çığarırğa niätli. Berençedän, bu saylawlar aldınnan otışlı. İkençedän, satudan kergän salım cirle büdjetta qala. Mäskäwdä genä bu aqça 20 milliard rubl' çaması, ä Qazanda 1 milliardqa yaqın dip äytelde sessiädä. Şuña kürä, prezident sessiädä qatnaşuçı Däwlät Duması deputatlarına, bergä kiñäşmä ütkärep, älege salımnı ğämäldän çığarğançı, Däwlät Şurası isemennän möräcäğät tözergä yärdäm kürsätergä täqdim itte. Ä Tatarstannan saylanğan Duma deputatları sessiädä bu yulı küp ide. Färidä Ğaynullina, Flürä Ziätdinova, Fändäs Safiullin, Federatsiä Şurasındağı wäkil İrina Laroçkina. Sessiäneñ ikençe öleşendä Rusiä Däwlät Duması wäzğıäte tä'sire sessiädä yaxşı uq sizelde.

XS
SM
MD
LG